Cable Street Beat erakundeak Londreseko Cable kalean 1936ko urriaren 4an burutu zen batailatik hartu du bere izena. Egun horretan, euskal militante ekintzaile, jeltzale, sozialista, komunista eta enparauek Euskal Herrian Mola jeneral faxistaren lehenengo ofentsibarekin amaitzen zuten bitartean, Londreseko East End auzoko Cable kalean Britaniako Faxisten Batasunak (BUF) antolatutako martxaren eta berau defendatzen zuten polizien aurka matxinatu ziren auzokideak, komunistak, anarkistak, judutarrak, sozialistak eta irlandarrak elkarren ondoan aritu zirela.
Gainera, Alderdi Komunistak Espainiako Fronte Popularrari elkartasuna adierazteko Trafalgar Square-ndeitutako kontzentrazioko kideek BUFen "alkondara beltzen" aurka joatea deliberatu zuten eta 300.000 pertsona baino gehiago batu zen aipatu kalean eta inguruetan, 3.000 faxistei eta 10.000 poliziei aurre egiteko. Egun horretan, langileriaren batasun antifaxistak garaipena eskuratu zuen eta BUFen eta Poliziaren armadak ihes egin behar izan zuten, burua makurtuta.
Cable Street Beat Euskal Herriaren oharra:
Cable Street Beat Ingalaterran jaio zen 80ko hamarkadan. Urte horietan musika talde ultraeskuindarrek goraldi handia bizi zuten, eta ezkerreko alternatiba musikal bat beharrezkoa zela ikusita, Cable Street Beat alternatiba hori eskaintzen saiatu zen.
Hamarkada honetan, Cable Street Beaten ideia berreskuratu da Alemanian. Punk eta Skinhead mugimenduaren barnean dauden balore ezkerzale eta antifaxistak berpizten saiatu dira alemaniarrak. eskuina toleratzen duen joera apolitikoa agertzearekin batera, balore horiek arrisku larrian zeuden. Modu horretan, faxisten estetika, jarrera eta mezuak aukera ederra du politikarenganako interesik ez duen gazteria kutsatzeko.
Euskal Herrian antzeko prozesua bizitzen ari gara baina berezitasun batekin. Hemen, haien burua ezkertiatzat jotzen duten batzuk dira eskuina toleratzen duen eszena apolitiko hori bultzatzen ari direnak. Arrazoi horregatik, oso idei ona iruditu zaigu Cable Street Beat gure herrian antolatzea, hau da, "zorrozki antifaxista" den alternatiba musikala eskaintzea.
Cable Strreet Beat irabazi asmorik gabeko antolakunde bat da. Egin beharreko lan guztia borondatezkoa da eta irabazkin osoa talde musikalak ekartzen gastatuko da. Ezkerrari irekitzen zaion gune bakoitza, eskuinari ixten zaion gunea da.
Euskal Herriko Cable Street Beat erakunde antifaxista aurkeztuko dute bihar Itzubaltzetan
Bihar larunbata, Cable Street Beat erakunde antifaxistaren Euskal Herriko atala aurkeztuko dute jendaurrean Itzubaltzeta / Romoko gaztetxean. Hitzordua arratsaldeko 8etan jarri dute, eta ekimena musikarekin duen lotura azpimarratzeko kontzertua ere antolatu dute. Bertan joko dute Akitaniako Bordele herriko Redweiler punk-oi! taldeak, Galdakaoko Kosetxa Propia hardcore eta punk egiten duen bandak eta Ovariosvarios bertako emakume gazteen punk-rock taldeak. Ondoren, Maiakovski DJak ska gaua dinamizatuko du gazte zentro sozialean, skinhead reggae, northern soul eta bestelako doinuak ere entzungai izango direla. Aniztasuna izango da hortaz, gauaren ildoa, Cable Strret Beaten aburuz, "ezkerrari irekitzen zaion gune bakoitza, eskuinari ixten zaion gunea baita". Sarrera lau eurotan erosi ahal izango da gaztetxearen atean bertan. Dagoeneko beste herrietan dagoen erakunde hau Euskal Herrian ere sortzearen arrazoia da musika munduan "eskuina toleratzen duen eszena apolitikoari" amaiera eman eta "zorrozki antifaxista" den alternatiba musikala eskaintzea".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun