ETAk hildako 15 pertsonekin batera, GALek eraildako Xabier Galdeano omentzeko asmoa "iraingarritzat" jo du Uribe Kostako Amnistiaren Aldeko Mugimenduak. “Konponbide baten beharraren ikuspegitik, kontua ez da egindako zerrendan Pagaza, Beltza, Txikia, Zulu eta Aitor Elortza ez sartzea, kontua ez da frankismoak eta sasi-demokrazia espainolak hildako guztiak ez sartzea, kontua da Xabier hil zutenek eta Xabierren hilketarekin kolaboratu zutenek, orain Xabier erabili nahi dutela Euskal Herriak jasaten duen zapalketa eta salbuespen egoera zuritu eta oraingo estatus politikoa mantentzeko, hau da, Xabier hiltzeko izan zituzten helburuak berak dituela Getxoko Udalaren ekimen honek. Ekimen hau gerra zikinaren luzapena besterik ez da”, adierazi zuten errepresioaren kontrako erakundeko kideek, Galdeanori ostiralean egindako omenaldian. Bertan izan ziren etxekoek adierazi zuten tokiko erakundeak ez diela ezer jakinarazi eta ez direla beraiekin harremanetan jarri. "Xabier hil zutenean Udalak ez zuen ahorik zabaldu ere egin eta 24 urte hauetan ez du ezer egin horren gainean", salatu zutenez. Beraientzat biktima guztiak batera omentzeak "inoiz zentzua izatekotan gatazka konpondu eta gero" izan dezake, "baina Udalaren ekimen honen asmoa ez da ez konponketarik, ez adiskidetzarik bultzatzea, itxura egin nahi dute besterik gabe, dena dagoen bezala jarraitu dadin". Bere senidearen "izena erabiltzearen guztiz kontra" agertu ziren Galdeanoren etxekoek. Argazkian, Galdeanoren argazkia ikurrinez inguratuta ostiralean / Etengabe.
Ostiral iluntzean, 200 lagun inguruk egin zioten omenaldi xume eta adeitsua Xabier Galdeanori, Algortako Telletxe plazan, Uribe Kostako Amnistiaren Aldeko Mugimenduak Etengabe bitakoraren bitartez adierazi duenez. Zortzietan hasi zen kontzentrazioa. Erdian zen, bihar 24 urte GALek eraildako algortarraren argazkia ikurrinekin, eta inguruan jendea presoak, iheslariak eta Galdeano bera gogoratzeko pankartekin. Bertsolari baten agurraren ostean, Galdeanoren bizitzari errepasoa egin zion AAMko kide batek. "Gerra zikina Euskal Herriaren aurkako estrategiaren elementu bat besterik ez" dela adierazi zuen, eta "herri honen aurka bideratutako zapalketa eta errepresio guztia, legezkoa izan zein legez kanpokoa izan, gerra zikina ere" dela azpimarratu zuen, “herri honek libre izateko eskubide osoa duelako”. "Zapalketa zikin eta zital guztiei aurre egitera" deitu zuen errepresioaren aurkako erakundeko kideak, eta "Euskal Herriak Xabier eta Xabier bezala borrokari eusten diotenen herritarren besoetan zutik iraungo duela" gaineratu. Amaitzeko "Eusko Gudariak" kantatu zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun