Erandion eta Sopelan bina gizon atxilotu dituzte tabernetan lapurtzea egotzita
Ertzaintzak 32 eta 35 urteko bi gizonezko atxilotu zituen atzo, igandea, udalerri horretako pub batean lapurtzea egotzita. Eusko Jaurlaritzaren Herrizaingo Sailak zabaldutako bertsioaren arabera, lokaleko langile batek ohartarazi zuenez, lau lagun itxiera orduan sartu ziren eta, edari bat hartu ostean, horietako hiruk alde egin zuten. Pubeko arduradunak beste gizonezkoa lokaleko tokiren batean ezkutatuta zegoela iritzita, Ertzaintza ohartarazi zuen. Bestalde, Sopelan beste bi pertsona atxilotu zituzten atzo goizaldean, kafetegi batean lapurtzea egotzita. Polizia iturrien arabera, pertsiana indarrez zabaldu eta leiho bateko kristala hautsi zuten 30 eta 42 urteko bi gizonezkok, jabeak lokalean utzitako dirua eta txanpon-makina bat osteko. Ustezko lapurrek lokaletik ihes egin zutenean, zenbait lekukok Ertzaintza ohartarazi zuten. Herritar horiek ustezko lapurrei buruz eskainitako ezaugarri fisikoen deskribapenari esker atxilotu ei zituzten gizonezkoak, atari batean ezkutatuta zeudela.
Herrizaingo Sailaren arabera, beste bi aldiz ostu dute pubetan Erandion atxilotutako lagunek, jardunbide bera erabiliz. Bertaratutako polizia agenteek antzeztokiaren oholtza azpian pertsona bat atzeman eta atxilotu zuten, lapurtzen saiatzeagatik. Halaber, taberna inguruetan, beste lagun bat harrapatu eta atxilotu zuten ondarearen kontrako delitu-saiakuntza bat egotzita. Sopelan atxilotuetako bietako bati udalerri horretan hil honen hasieran jazotako indarkeriazko lapurreta bat egin izana ere leporatu diote.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun