Amnistiaren Aldeko Mugimenduaren salaketa:
Ezer baino lehen Amnistiaren Aldeko Mugimendutik gure kezka adierazi nahi dugu zortzi atxilotuen jasan dezaketen tratuaren inguruan. Pasa den urtean 62 tortura kasu izan ziren salatuak, hauetako 33 espainiar poliziaren esku egondako euskal herritarren aldetik. Atxilotuak une honetan inkomunikazio egoeran egoteak benetako tortura arriskuan daudela esan nahi du.
PSE eta PPren akordio errepresiboaren neurria erakusten du operazio berri honek. Herri honetako sektore oso bat ezabatzea da akordio horren sostengu nagusia, eta horretarako armak, poliziak, tortura eta espetxea erabiliko dituzte besteak beste.
Gazteria independentistaren aurkako operazio eta jazarpen hauek argi erakusten dute Euskal Herrian lan politiko eta soziala atxiloketekin, inkomunikazioarekin, espetxearekin eta sakabanaketarekin ordaintzen dela. Gazte mugimenduan lan egitea terrorismoa da espainiar estatuan. Honek erakusten du zein den espainiar demokraziaren maila. Herritarren eskubide zibil eta politikoen etengabeko ukazioa ezarri dute Euskal Herrian eta horrek gutxi du demokraziatik.
Gertaera larri hauen aurrean kalera atera eta mobilizatzeko deia luzatzen dugu Amnistiaren Aldeko Mugimendutik.
Espainiako Poliziak zortzi gazte atxilotu ditu Hernanin, kale erasoak egotzita
Baltasar Garzon epailearen aginduz, zortzi gazte atxilotu ditu bart Hernanin Espainiako Poliziak, kale erasoekin eta Segi gazte erakundearekin zerikusia dutelakoan. Asier Olano Zabaleta, Txaber Zabaleta Galdeano, Aitzol Arrieta Erauskin, Egoitz Balerdi Ugalde, Jon Ezeiza Jauregi, Eki Oñate Arrospide, Mikel Gartzia Otamendi eta Iñigo Arzelai Duran dira zortzi horiek, Amnistiaren Aldeko Mugimenduak jakinarazi duenez. Haien etxebizitzak miatu ditu Poliziak, baita Garin herriko taberna, Kontrakantxa gaztetxea, Aker taberna, Karbonera gune okupatua eta Plaza Berrin dagoen egoitza bat ere. Materiala eraman dute. Atxilotuak Donostiako polizia etxera eraman dituzte, berri agentziek diotenez, eta han dauzkate oraindik. Argazkian, atxilotuetako bat kotxez eramaten / Gaztesarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun