Dagoeneko San Juanak antolatzen hasteko ordua heldu zaie Barrikan. Hori dela eta, jai batzordean parte hartzera deitu ditu herritarrak eta elkarteak Udalak. Lehenengo bilera, ostegun honetan, apirilak 2, egingo dute, arratsaldeko zazpietatik aurrera, udaletxeko batzar aretoan. Tokiko iturriek adierazi dutenez, "denon partaidetza hainbat eta handiagoa izan, orduan eta arrakasta lortzeko aukera gehiago izango dugu ekitaldi ezberdinak programatzeko orduan". Bestalde, gogoratu dute, erabakiak lehenengo egunetik bertatik hartzen hasiko direla. "Beraz, interesa edo ideia berririk izanez gero, eta edozein arrazoirengatik etortzerik ez baduzu, deitu ezazu udaletxera eta eman zure izena hurrengo batzarretara joan ahal izateko", zehaztu dutenez. Bitartean, apirilaren 8ra arte egongo da Barrikako San Juan jaietako kartel lehiaketan parte hartzeko aukera. Argazkian, otsailaren 3an San Blas eguna ospatu zuten barrikoztarrek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun