Leioako ongi etorri mezua:
Aurreko urtarrilaren 23an Arantza eta beste zazpi euskal herritar atxilotu zintuzteten hauteskunde antidemokratiko batzuetan parte hartu nahi izateagatik.
Argi geratu da Espainiar Estatuaren helburua zein izan den atxiloketa hauek burutzekoan: beste behin ere Euskal Herriaren hitza zapaltzea eta independentismoa klandestinitatera kondenatzen saiatzea. Baina argi geratu da baita ere hauteskundeetan edozein ilegalizazio, errepresio eta kriminalizaziorekin ez gaituztela gelditu. Herri oso bat isilaraztea ez zaie hain erraza izango eta aurrean edukiko gaituzte errepresioaren gainetik borrokatzeko prest.
Ezin dugu ahaztu duela hilabete batzuk zuk pairatutako egoera jasangaitz berdina jasan behar izan dutela Hernaniko zortzi gaztek astearte honetan. Momentu honetan torturatuak izateko arrisku bizian daude eta horren adierazle da, haietako bat ospitalera eraman behar izan dutela.
Honetaz gain, azpimarratu nahi dugu UPVn errepresio bortitzak ez duela etenik eta ekimen batzuen ondorioz, unibertsitate antidemokratiko honetan 80 identifikatu, 48 auziperatu, 5 atxilotu eta hainbat ikasle zaurituak suertatu direla. Sei epaiketa desberdin edukiko ditu ikasle mugimenduak eta hau ere UPVk aurrera eramaten duen errepresioaren isla da.
Arantza, jaso ezazu Leioako ikasle, irakasle eta langileen partez ongi etorri bero bat, zu berriro gure artean egotea poztasun bat delako; baina ezin ditugu ahaztu oraindik barruan dauden beste irakasle batzuk, Karmelo eta Zalakain. Txalo bero bat UPVko ikasleriaren partez.
Ongi etorri Arantza!
Arantza Urkaregi unibertsitateko irakasle bilbotarrari ongi etorria eman diote gaur goizean 70 bat ikasle, irakasle eta langilek Leioa eta Erandioko campusean, Gaztesareak jakinarazi duenez. Urkaregi pasa den urtarrilaren 23an atxilotu zuen Espainiako Polizia Nazionalak, D3M hautesle elkartea hauteskunde autonomikoetara aurkeztu ahal zezan laguntza eman zuelakoan. Auzitegi Nazionaleko Baltasar Garzon epaileak zuzendutako operazioan, beste 7 lagun atxilotu zituzten, tartean Iker Rodrigo lutxanarra eta Eli Zubiaga algortarra. Zortziak askatu zituzten martxoaren 24 eta 25a bitartean. Gaur, unibertsitateko lankide, ikasle eta lagunek pozarren pozez Urkaregiri ongi etorria ematearekin batera, bere atxiloketa "Euskal Herriaren hitza zapaltzea eta independentismoa klandestinitatera kondenatzeko" beste saiakera dela salatu egin dute. Era berean, ildo beretik baloratu dute astearte honetan atxilotutako zortzi gazte hernaniarren kasua, eta "torturatuak izateko arrisku bizian" daudela gogoratu dute. Gainera, "haietako bat ospitalera eraman behar izan dutela" eta haien kezka azaldu dute. Baina Estatu espainolak erabiltzen duen errepresioaz gain unibertsitateak erabiltzen duena ere kritikatu dute, tartean hainbat zauritu, 5 atxilotu, 48 auziperatu eta 80 identifikatu aletu dituztela. Karmelo Landa eta Jexuxmari Zalakain campuseko irakasleak oraindik orain espetxean daudela gogoan hartu dute ere. Argazkia: Gaztesarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun