Getxo Rugby Taldea 1975ean sortu zen, “Pitxon”, “Pepillo”, “El Brujo” eta beste askoren lanari esker. Bizkaiko Ligan jokatu zuen lehenengo aldiz, Barakaldoren aurka. Laugarrena izan zen liga hartan. 1978an 2. mailan sartu zen, eta 1980an lehenengoan. Hamarkada horretan igoerak eta jaitsierak izan zituen, baina hamarkadaren amaieran kategoria gorenean finkatu zen. Milurteko berrian, Espainiako Ohorezko Dibisioko B kategoriara jaitsi da behin. Gaur egun, onenen artean segitzeko borrokatzen ari da. Horretarako, funtsezkoa izango da igandeko partida, Valladoliden aurka, Errugbi Egunari amaiera emango diona. Nesken taldeak denboraldiko kontrapuntua jarri du, Espainiako Erreginaren Koparen finalerdietara iritsi ondoren; titulua berresteko ahalegina egingo du. Neskek joan den urtean ospatu zuten hogeigarren urteurrena.
Sortu zenetik, ligako titulu bat (1992-1993) eta kopako lau (1990, 1991, 1992 eta 1997) eskuratu ditu. Gainera, txapeldunordea izan da ligan behin eta birritan kopan, azkena 2005ean Zaragozan. Nesken taldea, Erreginaren Koparen irabazlea gaur egun, 2001ean txapelduna izan zen, eta 2004an txapeldunordea.
Egitaraua:
Apirilak 4, larunbata
12:30 Rugbya kalean. Getxo Artea RT-ko jokalariek Torrene eta Zabala kaleetan dabiltzan pertsonak baloi obalatua ukitzen animatu, autografoak sinatu, omenaldi honetarako egindako argazkiak banatu eta neurri ezberdinetako baloiak oparituko dituzte. Dena jai giroan, trikitilariekin.
13:30 Getxo RT-aren bandera altxatuko du Christophe Lamaison "Titou" Frantziako jokalari ohiak Telletxe plazan.
13:45 Getxo Artea RT-ren aldeko topa, suziriekin. Getxo udalerriko kirol klubetako ordezkariak eta gonbidatutako kirolariak egongo dira.
15:00 Herri bazkaria, 300 lagun ingururentzat, Zabala eskolan (animazioa, kamiseten zozketa, gonbidatu bereziaren hitzak).
Apirilak 5, igandea
11:45 Fadurako zelaian, Getxo Artea RT-ko nazioarteko jokalarien desfilea, garai ezberdinetakoak, bandera horibeltzarekin, agintari ezberdinen aurrean.
12:00 Getxo Artea eta Quesos Entrepinares taldeen arteko partida, 2008-2009ko Ohorezko Mailako Ligan Faduran jokatuko den azkena.
Getxo Artea taldeari omenaldia egiteko asmoz, Rugby Eguna prestatu dute larunbat honetarako, apirilak 4, Bizkaiko Kirol Prentsaren Elkarteak eta Getxoko Udalak. Kutsu herrikoia eman gura diote ospakizunari. Hori dela eta, biharko ekitaldiak Algorta erdialdean egingo dituzte. Besteak beste, eguerdiko ordu bata t' erdietan klubaren bandera altxatuko dute Telletxe plazan. Horretan berebiziko protagonista izango da Christophe Lamaison "Titou", Frantziako selekzioarekin nazioarte mailan aritu zen jokalari bikaina. Jose Luis Bilbao Bizkaiko ahaldun nagusia, Imanol Landa Getxoko alkatea, Gerard Murillo 22 urtez Espainiako hautatzaile izandakoa eta Tintxu Martinez Getxo Arteako presidentea izango ditu lagun horrek. Ekitaldiek jarraipena izango dute igandean Faduran. Egun horretan, horibeltzek Ohorezko Mailan jarraitzen duten ala ez jakiteko berebiziko partida jokatuko du Getxo Arteak, eguerdiko 12etan, Valladolideko Quesos Entrepinares taldearen kontra. Aurretik desfilea egingo dute jokalariek. Argazkian, asteartean aurkeztu zuten Rugby Eguna, Artea merkataritza gunean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun