Gaur, apirilak 3, sekula baino harrera beroagoa egin diote Uribe Kosta eta Erandioko lagunek Korrikari. Bitartean, Koska irratiak uhinen bidez egin du Korrika, lau ordu pasatxoko irratsaio berezia eskainiz. Eguraldiak lagundu duela, ordutegia ona izan dela, euskararen aldeko jarrera gora doala, herritarrek botere aldaketari erantzuten hasi diotela... ugariak dira atera daitezkeen ondorioak. Esaera zaharrak esaten duen bezala, zenbat buru hainbat aburu. Kontua da gaur arratsaldean, giro ezin hobeagoan, Uribe Kosta eta Erandioko milaka eta milaka herritarrek erantzun diotela AEKk deiari, Lemoizetik Lutxanara 60 kilometro gehiago gehituz euskararen aldeko bideari. Bada, oinak martxan ditugu jada. Hortaz, jar dezagun dantzan mingaina. Saria gutxi izango balitz bezala, bihar berriro bueltatuko dala Korrika, ibaiadarra zeharkatuta, Altzagara, goizeko 7:30ak inguruan, Erandio Landa eta Asua igarotzeko. Erandion beste sei kilometro egingo ditu Korrikak. Dudarik ez eduki bihar ere goiari eutsiko diotela eskualdeko herritarrek. Aurten Lutxanako traineruak eramango du lekukoa, Barakaldotik Erandiora. Argazkian, Branka kultur elkarteko kideak lekukoa eramaten Itzubaltzetan.
Igandean, amaiera izugarria egingo du Gasteizen Korrikak. Aurtengo abestia egin duen Betagarri taldeak ere joko du bertan. Gauzak horrela, hara joateko autobusa antolatu du Uribe Kostako AEKk. Garraioa Gorlizko Mota gurutzabidetik abiatuko da goizeko bederatziak eta laurdenean; eta ondoko geldialdiak egingo ditu: 9:25ean, Plentziako Charterren; 9:35ean, Sopelako eliza aurrean; 9:45ean, Berangoko kultur etxean; 9:55ean, Algortako Txikia plazan; 10:05ean, Itzubaltzeta / Romoko San Jose eliza ondoan; 10:15ean, Leioako Itxasbiden; eta azkenik, Erandion, 10:25ean, Altzagako gasolinoan. Bueltako bidaia 19:30ean egingo dute Gasteiztik. Horrenbestez, ondoko telefono zenbakietara deituta, 946 773 646, 944 304 734 edota 944 646 063, egin daiteke izenematea. Autobuserako txartela 8 eurotan egongo da. Beraz, oinez edo uhinen bidez egin dezagun Korrika.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun