Norgehiagoka ez da txarto hasi Getxo Artea Rugby Taldearentzat. Lehenengo ordu laurdenean bi zigor kolpe gauzatu ditu Palumbok, hori-beltzei partiduari aurre egiteko adorea emanez. Bere jokoa egitea zaila eduki dute orduan valladolidtarrek. Hala ere, lehenengo zatia markagailua aurretik zutela amaitu dute Quesos Entrepinares taldekoek, Mahamud-en dropa eta Pardoren markari eskerrak, luzapenean. Bigarren zatian ere kementsu atera dira zelaira Getxo Arteako rugbylariak: Abatek entsegua lortu eta Palumbok transformatu ostean, beste kolpe bat gauzatu du argentinarrak, markagailua 16-8 jarriz. Hala ere, orduan bilakatu da partidako protagonista Jose Bogas arbitroa, David Hernandez eta David Martin kanporatuz. Hori gertatuta, emaitza defendatzea jarri du helburu bezala Getxo Arteak. Hala ere, ez du lortzerik izan. Valladolidekoek berdintzea lortu dute 64. minutuan eta, bi zigor kolpe erratu ostean, Palumbok hirugarren bat gauzatu duen arren (19-16); berriro ere luzapenean, entsegua egin du Pedro Martin valladolidtarrak. Molinak transformatu ostean, 19-23 izan da azkeneko emaitza.
Jose Luis Martinez "Karra": "Beti marran jokatzen baduzu, azkenean erori egiten zara"
Behin partida amaituta, Jose Luis Martinez "Karra" Getxo Arteako entrenatzaileak adierazi duenez, "esan ohi den bezala, arbitroak amaiera jo arte norgehiagoka ez da amaitu. Hala ere, denboraldi osoan arrastaka daramagun kontua da hori, minutuak soberan izan ditugu". Arbitroak erakutsitako txartel gorriei dagokienez, lehenengoa "epailearen interpretaziotzat" jo du Karrak. Bigarrenari, ordea, "gure buruei egindako mesede eskasa" deritzo entrenatzaileak. Protestatzeagatik kanporatu dute David Martin. Amaitzeko, "aukerarik badaukagu Madrilen aprobetxatu egin beharko da, baina beti marran jokatzen baduzu, azkenean erori egiten zara", aipatu du Karrak.
Ezin izan zaio gaur amaiera onik eman atzo ospatzen hasitako Rugby Egunari. Getxo Arteak galdu egin du eguerdian Valladolideko Quesos Entrepinares taldearen aurka, Faduran jokatutako partida; eta maila galtzea gertuago daukate hori-beltzek. Gaurko norgehiagoka irabaztea beharrezkoa zuen Getxo Arteak azken postutik ateratzeko. Partida amaitzeko bi minutu falta zirela 19-17 irabazten zihoazen etxekoak, baina luzapenean jokaldi oso bat arilkatu dute Valladolidekoek, partida irabaziz. Aurretik, txartel gorria erakutsi die David Hernandez eta David Martin getxoztarrei. Ondorioz, 20 minutuz bi jokalari gutxiagorekin jokatu behar izan du Getxo Arteak. Promozioa jokatzera heltzea ez dago, orain, hori-beltzen esku bakarrik. Azken jardunaldian, Ohorezko Mailako txapeldun bilakatu berri den CRC Madrid garaitu behar izango dute Fadurakoek, 2006/07 denboraldiko balentria erdietsiz. Hala ere, Les Arbelles taldeak Cajasolen kontra ez badu galtzen jai daukate getxoztarrek. Argazkian, partida bukatzean lur jota zeuden Getxo Arteako jokalariek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun