Aste Santuan bidaiarien kopurua "nabarmen" jaitsiko dela iritzita, garraio zerbitzua egokituko du Metro Bilbaok. Horrela, apirilaren 8tik 13ra, hau da, asteazken honetatik datorren astelehenera arte, azken trena 22:55ean irtengo da Etxebarritik Portugaletera eta 23:00etan Plentziara. Beste norabidean, azken metroak Plentziatik 22:20an eta Portugaletetik 22:35ean abiatuko dira. Hortaz, egun horietan ez da gaueko zerbitzurik izango, ezta autobus zerbitzu osagarririk ere. Hilaren 13tik 19rako Pazko Astean, berriz, aldaketa hauek izango dira: 7:00etatik 10:30era, Plentziako maiztasuna, norabide bietan, 18 minutukoa izango da, 20 minutukoa izan beharrean. Aste horretan Bezeroen Arretarako Bulego bakarra egongo da irekita, San Inazioko geltokikoa. Eta ohiko ordutegiarekin arituko da, 8:30etik 19:30era. Argazkian, metro geltoki batean bidaiariak sartu irtenean.
Metro Bilbaoko arduradunen arabera, "metroa masak garraiatzeko diseinatuta dago eta eskaria masiboa denean giza baliabideak eta baliabide teknikoak biderkatzen dituen bezala, eskaria erdira jaisten denean, Aste Santuan bezala, baliabideak eskari horretara egokitzen dira". Euren hitzetan, Aste Santuan, "okupazioa txikiagoa" izaten da, "edozein igandetako batez bestekoa baino %40 txikiagoa alegia". Urtez urteko datuei adituz, urte osoan erabiltzaile gutxien dagoen garaia dela deritzo Metro Bilbaok.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun