Urtero legez, Ostiral Santuan egingo dute Jesusen Pasio Bizia Berangon. Horrenbestez, 20:30ean hasita, lehenengo pasarteak eliz parean eta Dolores Aguirreren etxe inguruko lorategietan egin ondoren, Simon Otxandategi eta Elexbide kaleak hartuko dituzte, udaletxe atzealderaino iristeko. Bertan antzeztu ohi dute gurutziltzaketa. Orotara, 170 aktorek eta 80 langilek, argi eta soinu teknikari, ile-apaintzaile eta makilatzaileen artean, parte hartuko du Arte Eszenikoen Lagunak kultur elkarteak antolatutako pasioaren 29. edizioan. Gutxienez Bizkaian, gauez antzezten den pasio bakarra da Berangokoa, antolatzaileek nabarmendu dutenez. Berangoko Pasioa Bizia antolatu eta antzezteko behar beste diru batzen arazoak izaten dituzte urtero, "Udalak eta Aldundiak ematen duten laguntzak ez baitira nahikoak", Fernando Ansoleaga zuzendariak behin baino gehiagotan adierazi duenez. 25.000 euro inguruko aurrekontua du antzezpenak. Horren erdia eszenatokiak eta dekoratuak ordaintzeko izaten da eta, gainontzekoarekin, soinu eta argi teknikariei ordaintzen zaie. Izan ere, aktoreek musu truk egiten dute antzezkizuna. Argazkian, euri zaparrada handien eta haize bortitzen ondorioz, ezin izan zuten iaz Jesus gurutziltzatu.
Behintzat, iaz bezala, Aguirre Fundazioak luzatutako diru-laguntza gehitu zaio aurten beste erakundeek emandakoari. Horretaz gain, tokiko Elmet enpresak ere eman du dirua. Hala ere, berdin-berdin jarri beharko dute dirua euren poltsikoetatik pasioaren bultzatzaileek: 2.000 euro inguru. Agertoki nagusietan jarritako 500 aulkietako batean eseri nahi direnek ere 5 euro ordaindu beharko dute. Hiru ordu eta erdi inguruko antzezpenean, 3.000 eta 4.000 ikusle artean izatea espero dute antolatzaileek, eguraldiak laguntzen badu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun