Bertsoak eta atsotitzak uztartuz, iaz 26 talde lehiatu ziren Sopelako Esaera Zaharren Txapelketako XV edizioan, guztira 100 bat parte-hartzaile eta 200 bat ikusle. Kopuru horrekin inoizko parte hartzaileen kopurua gainditu zuten Sopelako AEK Nikola euskaltegikoek. Lehiaketari dagokionez, berriro ere sari nagusia Sopelatik kanpora joan zen, Bilbo eta Berangon bizi diren Badok 13 taldekoek eraman baitzuten, enegarren aldiz. Sopeloztarren esperantza zen Kokoloak taldea bigarren sailkatu zen. Finalaurrekoan, berriz, beste hiru talde geratu ziren kanpo. Hau Pittu Hau eta Pozoinak ohiko talde finalistak zein Biar izan ziren talde horiek.
Gotzon Garate omenduko du maiatzaren 16an Sopelako Esaera Zaharren Txapelketak
Datorren maiatzaren 16an ospatuko den Sopelako Esaera Zaharren Txapelketako XVI. edizioak Gotzon Garate idazle eta filologoa zena omenduko du. Izan ere, iaz zendu zen Garatek esaera zaharrak eta atsotitzak biltzen egindako lan aparta urteak joan eta urteak etorri txapelketaren antolakuntzarako ezinbesteko laguntza izan dute Sopelako AEK Nikola euskaltegikoek. Beste osagaiei dagokienez, aurtengo leloa "Jakinek ez deko kalterik" esaera zaharra izango da eta finalean abestuko diren bertsolariak ALBEko Jone Uria eta Aitor Mendiluze gipuzkoarrak izango dira. Aurretik, ohikoa denez, litekeena da kanporaketan ALBEko beste bertsolari batzuk aritzea. Eta ohiturei jarraituz, azken orduko aldaketaren ezean finala Ander Deuna ikastolan jokatuko litzateke. Izena emateko, aurtengo 100 esaera zaharren zerrenda eskatzeko, eta argibide gehiagorako 944 212 329 telefonora deitu edo honako posta elektronikoetara idatzi daiteke: jose-p@aek.org eta aitor-f@aek.org . Epea maiatzaren 11an bukatuko da. Honetaz guztionetaz hitz egiteko, antolatzaileetariko bat den Aitor Fernandez de Martikorenari elkarrizketa (mp3) egin diote Koska irratiko lagunek. Iazko argazkiak hemen ikus daitezke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun