Kamioi astunak Getxo Antzokiaren lanetara iristeko ustezko zailtasunek eta lurpeko aparkalekuak eraikitzeak ez dute Txiki eta Otaegi, ofizialki San Nikolas plaza bezalako jendearen elkartzeko eta harremanetarako gunearen suntsitzea eta 34 urtez itxita edukitzea justifikatzen. Garesti ordaindu beharko diren bizilagunentzako aparkalekuak, zergatik autoa beti lehentasunezko behar gisa?, antzokiaren orubean bertan ala bestelako toki alternatibotan kokatu zitezkeen.
Ekaineko udal batzarrean HAPOren aldaketa zehatza behin betiko onetsiz eta hondeaketa proiektua esleituz EAJk eta PSEk eraikin zaharraren eraispenarekin hasitako egintza burutuen politikarekin jarraitu dute. Jendearen harremanetarako udalerrian garrantzitsuenetarikoa den gunean burutu nahi den milioietako inbertsio honen aurrean Getxoko Ezker Abertzaleak San Nikolas plazan esku ez hartzea proposatzen du berriz ere eta antzoki berriaren eraikuntzarako alternatiba desberdinak aurkeztu eta herritarren parte hartze zuzenerako eta erabakitzeko bideak ireki daitezen.
Christian Reinicke, Getxoko hautetsi independentista
Urteak pasa dira Udalak Getxo Antzokiaren jabetza eskuratu zuenetik. Ezker Abertzaleak bideratu zuen erosketa hura aurrekontu zuzenketa baten bitartez eta 2002an bezala orain ere, kultur ekipamendu publikoetan inbertsioak egitearen aldekoak gara. Baina eraikin zaharra itxi eta eraitsi ondoren Udal Gobernuak aurkezten duen proiektua Getxo eta getxoztarren eguneroko beharrak asetzeko antzoki batena baino, ez dakigu zeren ikurra izango delakoan, eraikin handi eta dirdiratsua eraikitzeko proiektua da. Handinahikeria eta erakutsi behar horrek bolumen handiak espazio mugatuan sartzera behartu du, aisialdirako gune libreak eta kaleko argitasuna herritar guztiei kenduz. Horrez gain, ondoko Txiki eta Otaegi plazan ere esku hartu nahi dute. Ingurua berregiteko Getxo Antzokirako bidea plazatik bertatik altuera maila berean egokitzeko asmoa erakargarria bada ere, Basagoiti Etorbideko pendiza larriki handitzen da eta elementu historikoa izatearekin batera kultur ekitaldi txiki eta askotarikorako aproposa den kioskoa desagerrarazi dute. Argazkian, Getxo Antzoki berriaren maketa. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun