Arenas futbol taldearen mendeurreneko kontzertua hartuko du maiatzaren 7an Euskalduna Jauregiak
2009ko api. 16a, 19:24
Maiatzaren 7an, ostegunarekin, Arenas Club futbol taldearen mendeurrena ospatzeko ekitaldirik garrantzitsuenetako bat hartuko du Bilboko Euskalduna Jauregiak. Gunter Neuholdaren zuzendaritzapean, Miguel Ituarte piano-joleak, Bilboko Orkestra Sinfonikoak eta Ondarreta abesbatza areetarrak eskainiko dute “Cantando al Arenas” emanaldia, iluntzeko zortzietatik aurrera. Sarrerak, 20 euroko prezio bakarra izango dutenak, salgai daude jada iragan martxoaren 27tik. BBKren kutxazainetan, www.euskalduna.net eta www.bbk.es webguneetan, leihatilan edo 944 310 310 telefono zenbakian eskura daitezke. Horrekin batera, “Amigo Arenero” txartela ere aurkeztu dute, ospakizunei begira. Besteak beste, klubaren ereserkia jasotzen duen mendeurreneko CDa, doako sarrerak aipatu ospakizunen karietara antolatutako partiduetarako eta mendeurrenaren liburua erosterakoan %10eko beherapena izango dute txartel hori egiten dutenek. Argazkian, Imanol Landa Getxoko alkatea izan da “Amigo Arenero” txartela jasotzen lehena, Peña Centenario-ko buru Heliodoro Lafuenteren eskutik, atzo Tamarises hotelean egindako agerraldian / Urtzi Altube - Ilanda.eu.Konztertua bera izango da mendeurrenaren ekitaldietako bat, Ondarreta abesbatzak Arenas taldearen ereserkia zuen diskoa grabatu ondoren sortutako ideia. Diskoaren aurkezpenaren ostean, mendeurrenerako kontzertua egitea pentsatu zuten eta horixe da emaitza, Ondarreta abesbatzaren presidente Pablo Díaz Guardaminok atzo azaldu zuenez. Emanaldiak hiru pieza izango ditu: Dvorakaren “Dantza Eslaviarrak”, Brahmsaren “1 zenbakidun kontzertua piano eta orkestrarako” eta Dvorakaren “Te Deum”. Aipatutako kontzertua amaituko dute Arenas taldearen ereserkia interpretatuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun