Antzina, Erandioko auzo ezberdinetako baserritarrak batzen ziren, apirilaren hasieran aukeratutako egun eta tokian, musika doinuz eta dantzaz beteriko jai egunaz gozatzeko. Finean, erandioztar guztien arteko harremanak sendotzeko balio zuen ospakizunak. Bada, hainbat hamarkadatan galduta egon ostean, orain dela 19 urte berreskuratu zuen baserri giroko euskal jaia Berbots Erandion Euskaraz! elkarteak. Ordutik hona, udalerriko txoko ezberdinak txandakatuz egin dute festa urtetik urtera. Gauzak horrela, apirilaren 26an, igandearekin, Kukularran ospatuko dute aurtengo Kanpomartxo.
Egitaraua:
12:00 Dantzak: Goialde, Trabudu, Uztargi.
13:00 Bertsolariak: Arkaitz Estiballes, Peru Vidal eta Iker Zubeldia;. Gai jartzailea: Arkaitz Gomez.
14:30 Herri bazkaria (nork berea eginda).
17:00 Herri kantak, Kepa eta Robertorekin. Bitartean, umeentzako antzerkia, Potxin eta Patxin pailazoekin.
18:00 Erromeria Luhartz taldearekin.
Egun osoan zehar, musika, umeentzako puzgarriak, arku tiroa, jokoak, taloa eta batez ere, guztion animo ederra.
Doako autobusak egongo dira Kanpomartxora joateko
2009ko api. 16a, 21:37
Bi igande barru, apirilaren 26an, Kukularran ospatuko da Kanpomartxo. Bertara joateko, doako autobusak egongo direla jakinarazi du Berbots Erandion Euskaraz! elkarteak. Gauzak horrela, Altzagako San Inazio kalean dagoen Santi taberna aurretik abiatuko da garraioa eta Astrabuduako Mezo kaleko botika aurrean ere hartuko ditu bidaiariak. Maiztasunari dagokionez, Kukularrara heltzeko 11:30etik 20:30ak bitartean, ordu betero izango dira autobusak, 14:30, 15:30 eta 16:30ean izan ezik. Buelta egiteko, berriz, 12:00etatik 21:00etara egongo da aukera, ordubetero, 15:00, 16:00 eta 17:00etan kenduta. Eguerditik aurrera, dantzak, bertsolariak, antzerkia, jolasak... edukiko dituzte, egunean zehar, bertan batzen direnek. Besteak beste, Trabudu, Goi Alde eta Uztargi dantza taldeak eta Algortako Bertsolari Eskola (ALBE) dituzte laguntzaile Berbotsekoek. Argazkian, iaz Martiartun ospatutako Kanpomartxo jaia / Berbots.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun