Estatuko etxebizitza garestienetakoak ditu Getxok
2009ko api. 17a, 13:13
Espainiako Gobernuko Etxebizitza Ministerioaren datuen arabera, aurtengo lehen hiruhilekoan, etxebizitza libreen salneurriak %4,4 egin du behera Araba, Bizkaia eta Gipuzkoan; eta %3,6 Nafarroan, iazko epe bereko datuekin alderatuta. Hala ere, Donostiak Estatuko hiri garestiena izaten jarraitzen du eta, Getxo, hirugarren lekuan dago rankingean, Bartzelonaren atzean. Aurtengo lehen hiru hilabeteak kontuan hartuta, 25.000 biztanle baino gehiago dituzten udalerriak aztertuta ateratako datuak dira horiek. Gauzak horrela, bataz beste, metro koadroko 3.614,2 euro ordaindu behar dira Getxon. Espainiar Estatuan, prezioa %6,8 jaitsi da batez beste, metro koadroa 1.958,1 eurotan salerosi baitute, hau da, 2006ko prezioen antzera. Argazkian, orain hiru aste, Getxo udalerrian 3.500 etxe hutsik daudela salatu zuen Algortako Gazte Asanbladak (AGA) / Gaztesarea. Argazki gehiago ikusteko sakatu hemen.Etxebizitza babestuak %1,1 garestitu dira, baina prezioen adierazle nagusia (etxe libreak eta babestuak uztartzen dituena) %2,5 merkatu da iazko azken hiruhilekoaren datuekin konparatuta. Etxebizitza erabilien kasuan (bi urte baino gehiagoko antzinatasuna dutenak), prezioak %6,9 igo dira iazko epe berearen aldean, baina %2,5 jaitsi dira iazko azken hiruhilekoarekin konparatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun