Larunbat honetan Arenasek Gobelan jokatuko duen partida berezia izango da. Ekitaldi ugari egingo dira Zarautzen aurkako norgehiagoka ofizial horren inguruan. Mendeurrenaren kamiseta estreinatuko da bihar bertan. Kamiseta berria Dario Urzayk diseinatu du eta aurreko astean aurkeztu zuten. "Arropa berriak onarpen handia lortu du, eta seguruenik are gehiago asteburuko hitzordutik aurrera", futbol talde areetarreko arduradunek adierazi dutenez. Eta diseinu berri hori ikusteko, ordaindu beharrik ere ez da egongo. Biharko sarrera librea izango da, Gobelako harmailan jende mordoa egotea nahi dute eta, hain egun berezian. Arratsaldeko 5etan hasiko den partidaren ohorezko sakea Imanol Landa alkate getxoztarrak egingo du. Norgehiagokaren atsedenaldian, gainera, Arenas eta Romoko beheko mailetako taldeei omenaldia egingo zaie, klub bien harrobiak batu ondoren. "Gogoratu behar dugu Arenasen gazteen taldeak denboraldi honetan Estatuko gazteen kategoria gorenera igotzea lortu duela, Ohorezko Dibisiora alegia, historian bigarren aldiz", zehaztu dutenez. Argazkian, Iñaki Zuazo klubaren presidentea eta Dario Urzay kamiseta berriak eskuetan.
Kirol eremuan, Arenas taulako azkenaurrekoaren parean dago, Zarautz taldea, hain zuzen ere. Gipuzkoarrak kategorian irauteko borrokan ari dira. Iraupena, teorian, eta bestelakorik gertatzen ez bada, postu horietan egotetik bi puntutara baino ez dago. Arenas ezin daiteke despistatu talde horren aurka, daukan guztia ekarriko duena. Zarautzek Durangori irabazi zion joan den astean, eta orain sailkapen on bat aurkitu behar du lehen hamar taldeen artean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun