CRC Madrilen aurkako partidan, Getxo Rugby ondo moldatu zen lehenengo zatian, baina ondoren adorea eta sasoia galdu zuten getxoztarrek. Lehenengo zatian egindako erakustaldia Jeremias Palumbo argentinarrari zor diote, berak egin baitzituen puntu guztiak, 15 eta 19 garaitzeko atsedenaldiaren orduan. Bigarren zatian, 20 minutuz Getxok eutsi egin zion, nahiz eta ja partida berdinduta egon. Madrilek Feijoo, Tudela eta Cabralen bidez eskuratutako puntuei soilik erantzun zien Palumbo, berriro ere, eta 25 eta 22 markagailua erdietsi zuen, jada galeran sartuta.
Baina, hortik landa Getxo Artearen makaldia bizkortu egin zen, egindako ahalegina ordainduz. Gainera, Palumbok kolpe handia hartu zuen sudurrean eta utzi behar izan zion jokatzeari, CRC Madril bere jokalariak etengabe berritzen zituen bitartean. Dena den, Feijoo, Tudela eta Cabral izan ziren berriro Getxo zigortzeko arduradunak. Jabitxin eta Karraren taldean, soilik Pablo Rey izan zen aurre egiteko gauza, baian behar zutenetik oso urrun. Reyk eskuratutako entseguarekin 39 eta 27 jarri zen partida, ondoren dena maldan behera joan zela 53 eta 27 bukatu arte.
Autokritika
Hamar partida jarraian galdu ostean, nekez sinets zezaketen azken unean kategoriari eutsiko ziotenik baina Getxoko errugbylariek eta teknikoek zuten azken fede puntua desagertzean kolpe gogorra izan zen guztientzat. Partida galdu eta minutu batzuetara, lasaiago, prentsarekin mintzatu zen Jose Luis Martinez "Karra": "ezin izan da. Saiatu egin gara, minutu askotan hor izan gara, baina egun gu baino talde indartsuagoa dira. Urte ia osoan zehar jokalari gutxirekin etorri gara eta baita erdi lesionatutakoekin ere. Eta hori oztopo handia izan da. Horri gehitzen badiogu haiek aldaketaren bat egiten zutenean ohiko titular bati sarrera emateko zela, emaitza berez azaltzen da".
Baina, "Karra" haratago joan zen bere hausnarketan: “orain kontzientzia azterketa egin beharra daukagu. Zertan huts egin eta zetan asmatu dugun ikusi beharra dugu, eta hortik hasita datorren Ohorezko B mailako denboraldiari begira lan egiten hasi behar dugu", iradokitzen zuen. “Urte osoko analisia egin behar dugu, hotzean, baina gure miserietan galdu gabe, alderdi positiboa bilatuz eta emaitzak ateraz", proposatu zuen teknikariak.
Gizonezkoen armada horibeltzarenak egin du. Getxo Rugbyren jokalariek 53 eta 27galdu zuten atzo CRC Madrilen aurka, Ohorezko Ligako liderraren kontra, alegia. Eta galera horrekin, jaitsiera ekiditeko azken esperantza izpia desagertu egin da. Dena den, orain dela bi urte bezala in extremis garaitzekotan ez lukete zer ospatzerik izango, jada Getxo Rugbyrentzat ez baitzen nahikoa bere indarrekin jokatzea. Sailkapeneko azken aurrekoa den Les Abelles taldeak galtzea ere behar zuten getxoztarrek, baina valentziarrek erraz nagusitu zitzaizkien talde ahula aurkeztu zen Cajasol Ciencias-ekoei. Gauzak horrela, kluba ohitu beharko da errealitate berrira, B mailako Ohorezko Ligara, liga gorenean zazpi urte eman ostean. Ziur aski taldearen estruktura osoari eragingo dio aldaketa: hasteko, zuzendaritza batzorde berria aukeratzeko prozesua martxan dago dagoeneko. Ikusteko dago ia aurreko jaitsieran bezala (2001-2002), denboraldi batean goratzeko kapazak izango diren. Baina, denboraldia garaipen batekin ixteari ez dio oraingoz muzin egin Getxok eta indar guztiak bideratuko ditu orain Kopa irabaztera. Ordiziaren aurka izango dute laurdenetako partida bakarreko norgehiagoka, igandean, Goiherriko Fernando Trevijano zelaian. Argazkian, aurpegi luzeak ikusi ziren ere pasa den apirilaren 4an, Faduran, Quesos Entrepinares-en aurka galdu ostean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun