Bizkerrek antolatutako Getxoko Emakumeen III. Futbol Txapelketak bukaera ederra eduki zuen atzokoan, Algortako Fadura futbol zelaian. Etxekoak ez zuten finalera heltzerik izan, baina Espainiako Superligako talde onenetakoen artean bik bai. Estatu mailako titulua eskuratzeko puntu bat baino ez zaion falta Madrilgo Rayo Vallecanok Superliga irabaztea ondo baino hobeto dakiten Athleticen emakumeen aurka neurtu zituen indarrak. Hala ere, Iñigo Juaristiren neskak, oraindik hiru urtetako ibilbidea daukan Getxoko Emakumeen Futbol Txapelketan, lehendabizikoz finalera heltzearekin konformatu behar izan ziren. Sonia Bermudez 24 urteko aurrelariak sartutako "urrezko golari" esker joan zen atzokoan garaikurra Madril aldera. Argazkian, atzoko finala hasi baino lehen, emakumezkoen futbolaren “Getxo” marka aurkeztu zuten Faduran.
Lehiaketaren aurreneko fasean, aisa gailendu zitzaien Rayo Vallecano, torneo getxoztarreko iazko irabazle Oviedo Modernori eta Bartzelonari. Larunbatean jokatutako 40 minututako partida bietan zortzi gol sartu zituzten guztira madrildarrek. Finalean ez bezala, baina, ezin izan zuten atean hutsean utzi, Athleticen kontrako finalean gertatu bezala. Iragazpen guztiak betetzen badira, Getxoko Emakumeen Futbol Txapelketa irabazi eta gutxira, Superligako aurtengo txapelduna bilakatuko da Rayo Vallecano. Norgehiagoka amaitzeko bi partida falta direla, puntu bat baino ez dute behar horretarako madrildarrek. Lehenengo aukera Malagan izango dute, kanpoan, eta bigarrena, Xixongo Sportingen kontra etxean
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun