Idazleak azokan
Larunbatean, bertoko egileak egongo dira Liburu Azokan. Euren azken lanak aurkeztuko dituzte eta aleak sinatuko dizkiete bisitariei, 11:00etatik 14:00etara. Aurten honako autore hauek parte hartuko dute: Esther Zorrozua, “A contraluz” liburua aurkeztuko duena; Juan Carlos Martinez, "El rapto de un libro" lanaren egilea; Mikel Martínez argazkilaria, bere azken argazki-albuma aurkeztuko duena ("Getxoko Jaiak, Photoalbum 2008") eta Abraham Amezaga, "Elias Amezaga: Vida y obra", aipatu idazlearen inguruko azterlan autobiografikoa idatzi duena. Halaber, Toti Martinez de Lezea egile ospetsua egongo da Getxoko Liburu Azokan. Horiek baino lehen, eta Kultur Etxeak diseinatutako programatik at, Enrike Lopez EHUko irakasle kaleratua izan zen atzo Liburu Azokan. Lopezek 2006an "5.000 kilometro oinez euskal desobedientziaren alde" liburua argitaratu zuenetik plazaz plaza egin bezala, mahaitxoa jarri eta irakurleekin zuzeneko harremana landu zuen. Atzo, liburua erosteko aukera izan ez zutenek, Eztabaida gune autoritariora jo ahal izango dute, bertan ere salgai jarri baitute.
Horrezaz gain, haurrentzako jarduerak ere izango dira asteburu osoan zehar eta etxoletan eginiko erosketa guztiekin udal akuarioa bisitatzeko gonbidapenak oparituko dira.
Jazza
Arratsaldean, 20:00etan, jazza izango da erabateko protagonista Getxon. Areetako Andres Isasi Musika eskolak Pío Lindegaarden omenezko kontzertua hartuko du. Aurten James Carter (1969, Detroit, Michigan) saxo-jolea ariko da bertan. Ospe handiko artista da nazioartean musikari estatubatuarra, batez ere abesti batean estilo anitz interpretatzeko duen gaitasuna dela eta. Ia lau urteko atsedenaldia hartu ondoren iaz bere azken albuma grabatu zuen, "Present Tense", hain zuzen ere. Soinu lirikoen eta saxo hirutasunaren (sopranoa, tenorra eta baritonoa) aldeko apustua da diskoa eta, horrezaz gain, pieza batzuetan flauta eta klarinetea jo ditu.
Dantza Eguna
Igandean, Nazioarteko Dantza Eguna ospatuko da Algortan. Ospakizun hori dela eta, dantza eskola getxoztarretako ikasleek koreografiak aurkeztuko dituzte Algortako San Nikolas plazan. Ekimena dantza eskolek antolatuta dago, Eusko Jaurlaritzaren Kultura Saila eta Getxoko Kultur Etxearen laguntzaz. Esan bezala, 11:30etik aurrera, Getxoko dantza eskoletako ikasleek zenbait koreografia antzeztuko dituzte. Ikuskizun horretan, dantza garaikidea eta hainbat musika estilo uztartuko dira, jazza eta salsa, besteak beste. Koreografia guztiak ekitaldian parte hartzen duten akademietako irakasleek sortu dituzte.
Liburuak, jazza, antzerkia eta dantza izango dira asteburuan Getxon
2009ko api. 24a, 20:10
Kultur egitaraua anitza egongo da asteburu honetan Getxo udalerrian. Igandera arte, irakur zaleek Liburu Azokaren hamabigarren ekitaldiaz gozatzeko aukera izango dute Algortako Telletxe plazan. Bertan, liburuak erosteko aukeraz gain, hainbat jarduera egongo dira: esaterako, bihar, larunbatean, liburuak sinatuko dituzte hainbat egilek, 11:00etatik aurrera. Igandean, berriz, "Euskal Herriko itsasoa" lana antzeztuko du Giñol taldeak, Telletxen bertan, 13:00etan. Bihar ere Pío Lindegaarden omenezko kontzertua egongo da Areetako Andres Isasi Musika Eskolan, 20:00etatik aurrera. Aurten James Carter saxo-jole ospetsua izango da saioaren protagonista. Azkenik, asteburuko eskaintza dantzaren eskutik amaituko da igandean. 11:30ean, Getxoko dantza eskoletako ikasleak ariko dira Algortako San Nikolas plazan, Nazioarteko Dantza Egunaren ospakizuna dela eta. Argazkian, Liburu Azoka goizez eta arratsaldez egongo da zabalik larunbat eta igandean.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun