Ikasle Abertzaleen oharra:
Hezkuntza sistema arrotzen gainetik, ikasleria eraikitzera!
Ikasleok egun bizi dugun egoera, latza dela esaten hasi ginen urte hasierako prentsaurrekoan, eta egoera latza izaten jarraitzen duela errepikatu beharrean gaude gaurko prentsaurrekoan ere.
Baina, latza dela esan arren, horrek ez du ikasleria lo dagoenik esaten, alderantziz, egoera latz honetaz kontziente izanik, hamaika borroka piztu eta garatu ditugu ikasturte honetan zehar. Hezigune bakoitzak pairatzen duen egoera espezifikotik abiatuta, borroka propioak garatu ditugu eremu ezberdinetan, eskola eta fakultateetan. Horiek guztien adibide besterik ez dira, Santurtzin DBHkoen grebarako eskubidearen aldeko borroka, martxoaren 8aren testuinguruan garatu diren hezkidetza tailerrak, unibertsitatean Bolognaren gainetik bestelako unibertsitate eredu baten aldeko borroka, Lea Artibain egutegi propioaren alde emandako aurrera pausuak, Bilbon eskubide demokratikoen aldeko borrokak...
Baina borroka guzti hauek, ez dira modu isolatuan garatzen diren borrokak. Euskal ikasleok pairatzen dugun egoera latz honen erantzulea berdina da kasu guztietan; Hezkuntza Sistema Arrotzen inposizioa. Eta inposizio honen ondotik datozen zapalkuntzen aurka borrokatzen dugu, bakoitzak bere eskolan edo fakultatean
Horregatik, apirilaren 30ean Batera-jotze Nazionala deitu dugu. Batera-jotze nazional hau mobilizazio egun bezala ulertzen dugu eta eskualdekako mobilizazio hauek burutze bidean ikastetxe eta fakultateetan paroak deitzen ditugu. Bakoitza bere borrokarekin, Hezkuntza Sistema Arrotzen Gainetik, Ikasleria Eraikitzera! Lemapean kalera irteteko. Beraz, hemen batu garen ikasle eta abertzaleok, Bizkaiko ikasleriari dei egiten diogu, apirilaren 30ean burutuko diren mobilizazioetan parte hartze zuzena hartzeko:
Hauek dira Bizkaiko mobilizazioak:
Algorta: 12:00etan manifestazioa Txiki eta Otaegi plazatik.
Balmaseda: 11:30tan manifestazioa ikastetxetik.
Gernika: 12:00etan manifestazioa.
Igorre: 12:30ean manifestazioa.
Leioa: 11:30ean kontzentrazioa Askartza ikastetxean.
Leioa (UPV): manifestazioa.
Lekeitio: 11:30ean giza katea. 12:30ean eskolapean kontzentrazioa.
Markina: 12:00etan manifestazioa Lea-Artibai ikastetxetik.
Mungia: 11:30ean kontzentrazioa ikastetxean.
Mutriku: 11:30ean kontzentrazioa ikastetxean.
Portugalete: 11:30ean manifestazioa triangelutik.
Eta azkenik, Bilboaldeko Deustun hasiko da manifestazioa, San Pedro enparantzatik eguerdiko 12:30ean.
Beste behin ere, Bizkaia eta Euskal Herri osoko ikasle eta abertzaleak apirilaren 30eko batera-jotze nazionaleko mobilizazioetan parte hartzera deitzen ditugu.
Ikasle borrokaz lortuko dugu!!!
Hezkuntza sistema arrotzen gainetik, ikasleria eraikitzera!!!
Ikasle Abertzaleak
Ikasle Abertzaleek (IA) deituta, etzi, ostegunarekin, "Hezkuntza sistema arrotzen gainetik, ikasleria eraikitzera!" lelopeko nazio batera-jotze eguna izango da. Hortaz, apirilaren 30ean, batxilergo eta lanbide hezkuntzako institutuetako ikasleek bi mobilizazio burutuko dituzte eskualdean Bologna prozesuaren aurka eta ikasle eskubideen taularen alde. Horrela, herri ezberdinetako gazteak Algortako Txiki eta Otaegi plazan batuko dira eguerdian, manifestazioa burutzeko eta ondoren ekitaldia egiteko. Dena den, bertan ez dira ikasle guztiak izango. Uribe Kostako IAko kideek Koska irratiari (mp3) zehaztu diotenez, Leioako Askartza ikastetxe erlijiosoko zuzendaritzak ez die greba eskubidea onartzen beren ikasleei eta zigorrak aurreikusten duen dekretuaren erabilpen "oso tinkoa" egiten du. Hori dela eta, ikasleak ez dute greban aterako, baina atsedenaldiaz baliatuko dira elkarretaratzea egiteko eta "bertan IAk lanean jarraitzen duela erakusteko". Dena den ez da zentro hori arazoak izan dituzten bakarra. Esate baterako, Erandioko Tartangan egungo arautegiak jasotzen du greba egin ahal izateko ikasleek gurasoen baimena behar dutela, eta araua aldatzekotan badaude ere, oraindik indarrean dago. Azkenik, Artatza / Romon, bertako zuzendaritzak eskatzen duen quoruma ez du lortu oraindik grebaren aldeko botoa, bozketari jarritako epe murritzak direla eta. Bihar jakingo dute greba legalki aterako denetz. Leioa eta Erandioko campusean ere mobilizazioak izango dira. Argazkian, Uribe Kostako IAk iazko data berean egindako bizikleta martxaren irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun