Udalbiltzaren kontrako auzia salatu dute Algortan
2009ko api. 30a, 02:12
Udalbiltzaren aurkako auzia abiatu zenetik sei urte bete direnean, 35 bat lagunek egin zuten atzo elkarretaratzea Algortako Telletxe plazan, "amesgaizto honetan harrapatuta dauden 22 hautetsi eta langileei elkartasuna eta adierazteko" adierazteko, "baita eskubide zibil eta politikoak zapuzten duten sumarioetan inputatutako guztiei ere". Izan ere, 22 lagun horientzako espetxe zigorraz gain, "eraikuntza nazionaleko dinamikak, euskal instituzionalizatze dinamikak eta udalen arteko auzolan ekimenak kriminalizatzea" bilatzen dute Madrilen, Getxoko ezker abertzaleak salatu zuenez (mp3), "Euskal Herrian gertatzen ari den aldaketa politikoa zapuzteko asmoz". Auziperatuta dauden herritarrei babesa emateko eta legez kanpo uztearen arriskuaren aurrean Udalbiltza defendatzeko, berau berrindartzea jotzen dute bide eraginkor bakartzat hautetsi independentistek. Gauzak horrela, 1.999ko irailean, Udalbiltzaren sorreran, Euskalduna Jauregian erabakitako "konpromisoak berretsi" eta, horiek erakusten duten bidean, "Euskal Herriaren zutabetze instituzionala sendotzen joatea" eskatu diete alderdi ezberdinetako hautetsiei, "herri honek behar duen aldaketa politikoa gorpuzteko". Argazkian, Algortan egindako elkarretaratzea.Getxoko ezker abertzaleak gogoratu duenez, 2003ko Apirilaren 29an Espainiako Auzitegi Nazionalak "espainiar Polizia Nazionalarekin batera burutu zuen erasoa" eta atzoko urteurrenean 1.000 bat hautetsik protestak deituak zituzten hainbat lekutan, tartean Algortan. 2003ko egun hartan Udalbiltzak Astigarragan, Iruñean eta Bilbon zituen egoitzetan sartu, materiala eta ordenagailuak hartu, egoitzak prezintatu, kontu korronteak blokeatu, "Zuberoan garapen egitasmoak bultzatzeko herritarrengandik bildutako 400.000 euroak lapurtu", Udalbiltza eta Euskal Garapen eta Kohesio Fondoari suspentsioa ezarri eta 13 pertsona atxilotu eta espetxeratu zituzten, Udalbiltzako arduradunez gain bertako langileak ere bai. Egun 22 pertsona daude auziperatuta 10 eta 23 urteko espetxe zigor eskaerei aurre eginez.Hautetsi independentisten arabera, "nazio eraikuntzan eta udalen arteko elkarlanean emandako urratsak geldiaraztea zen eta da beraien helburua".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun