Leioako auzokideen oharra:
Maiatzaren 4an, astelehena, 20:00etan mobilizazioa Boulevardean.
Lan istripu gehiagorik ez!
Azken hiru asteetan bi langile leioztarrek galdu dute bizitza lanean zeudenean. Pasa den astean hil zen azkena, aste batzuk koma egoeran igaro ostean. Aurten 22 langile hil dira jada, lanean zirenean.
Gainera, egungo krisiaren testuingurua aprobetxatuz, enpresariek eta gobernuek aurrerapausoak ematen ari dira langileon eskubideak murrizteko eta dauden lan baldintza prekarioak handitzeko.
Haiek sortutako prekarietateak hiltzen du, eta bitartean batzuk grebarako eta mobilizaziorako arrazoiak ez daudela esaten dute.
Mobilizatzeko arrazoiak badira, bai gaurko, bai maiatzaren 21eko greba egunerako!
"Lan istripu gehiagorik ez!" lelopean, A.G. izeneko behargina zenari azken agurra emango diote gaur 20:00etan Boulevardean auzokide leioaztarrek. Izan ere, langilea pasa den apirilaren 29an hil zen Gurutzetako ospitalean, martxoaren 26an pairatu zuen lan istripu baten ondorioz. Ezbeharra Kantabriako Gajano herrian izan zen, Dynasol enpresan. Bertan, A.G. zein Pontevedrako M.L. beharginek Nervion Montaje y Mantenimiento azpikontrataren bidez egiten zuten lan. Biak produktu kimikoen ontzi bat konpontzen ari ziren, berau soldatuz. Ontziak eztanda egin zuen eta %40 eta %50eko erredurak, ubeldurak eta zauri larriak eragin zizkien. Lehenengo arreta medikoa Santanderreko Valdecilla ospitalean jaso ostean, Gurutzetara bideratu zituzten, behar zituzten ebakuntzak egin eta tratamendua jarraitzeko. Dena den, hori ez zen nahikoa izan A.G.-rentzat, pasa den asteazkenean hil zena. Beste langileak ospitalean darrai. LAB sindikatuak salatu duenez, dagoeneko Euskal Herriko 25 langile hil dira aurten, haietatik bi leioaztarrak. Hori dela eta auzokideek greba orokorreko deiarekin bat egin dute. Argazkian, A.G. hiru astetan hil den bigarren langile leioaztarra da, apirilaren 21ean J.G.R igeltsero leioaztarraren heriotza salatu baitzuten / Koska irratia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun