"Munduko Guantanamoak itxi!" lelopean, gaur abiatu dira Presoen Aldeko Taldeek (PAT) antolatutako Nazioarteko Gatazka eta Errepresaliatu Politikoei buruzko Jardunaldiak Bizkaiko fakultateetan. Leioa eta Erandioko campusean, Irlandako gatazka politikoa ardatz gisa hartuz, jardunaldiei hasiera eman diete goizean goiz jarritako erakusketa baten eta ikus-entzunezko proiekzio baten bidez. Bihar hitzaldia izango dute Txente Rekondo Nazioarteko Ikerketarako Euskal Bulegoko kidearen eskutik eta asteazkenean, berriz, oraindik ere Euskal Herrian estreinatu gabe, irlandar gose grebalariei buruzko "Hunger" pelikularen emanaldia egongo da. Bi ekitaldiok Gizarte Zientzien fakultatean izango dira, ER8 eta ER7 geletan, hurrenez hurren. Bitartean, San Mameseko Ingeniaritza Eskolan Zuzendaritzak oztopoak jarri dituela salatu du PATek. Argazkian, Txente Rekondok eskainiko du hitzaldia bihar / Sustraia (ber)piztu!
Maiatzaren 4tik 7ra bitartean izango dira PATek antolatutako Nazioarteko Gatazka eta Errepresaliatu Politikoei buruzko jardunaldiak. Leioa eta Erandioko campusean, Arangoitiko Irakasle Eskolan, San Mameseko Ingeniaritza Eskolan eta Casillan izango dira ekimenak. Hartara, astelehenetik asteazkenera bitartean, fakultate bakoitzak nazioarteko gatazka bat jorratuko du, maiatzaren 7an Leioa eta Bilbo artean ospatuko den jaialdi baten bidez gatazka guztiak bilduko direlarik. Azken eguneko jaialdiari dagokionez, 10:00etan izango da harrera, Leioako campuseko kafetegian. Ondoren, Sahara, Kurdistan, Euskal Herria eta nazioarteko hainbat gatazkei buruz arituko dira bertan. Ordu batean, manifestazioa eta ekitaldi politikoa egin ondoren, Bilboko Zazpi Kaleetan jarraituko du jaiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun