Ikasle Abertzaleen oharra:
Datorren maiatzaren 12an UPVko 30 ikaslek epaiketa bat daukate, azkenengo UPVko errektoretzako okupazioa dela eta.
Baina ez da hau, ikasleon aurkako epaiketa bakarra izango, eta ez dira epaiketak, Bolognaren aurka eta bestelako unibertsitate eredu baten alde borrokan dihardugun ikasleon aurkako eraso bakarrak. Azken urteetan, kameraz eta indar polizialez bete dira UPVko campusak.
Horregatik guztiagatik, eta zehazki, maiatzaren 12an epaituak izango diren 30 ikasleei elkartasuna adierazteko, sinadura bilketa bat jarri dugu martxan Ikasle eta Abertzaleok. Aste bete iraungo du sinadura bilketa horrek. UPVko campusetan, fakultatez fakultate mahaiak jarriko dira sinadurak biltzeko. Non nahi izango dute UPVko ikasleek, beraien atxikimendua emateko aukera.
Zehazki, hiru puntu nagusirekin egiten du bat bilatzen dugun atxikimenduak:
* Elkartasun eta babes osoa adierazi nahi diet maiatzean epaituak izango diren 30 ikasleei.
* UPVko errektore den Iñaki Goirizelaiari eta bere errektoretza taldeari aurrerantzean izango diren epaiketak bertan behera uzteko eskaera egiten diot.
* Ez dut campus polizialik onartzen. Segurtasun indar eta kamerak kentzeko eskaera egiten dut.
Ikasle Abertzaleak antolakundetik, UPVko ikasleei, beraien sinadura eman dezaten dei egiten diegu. Bizi dugun egoerak horrela jarraitu ezin duelako, eta ikasleon aurkako eraso guzti hauek, besterik gabe pasatzen ezin ditugulako utzi.
EHUko errektoretza okupatu zuten 30 ikasleren aldeko sinadura bilketa hasi dute
Gaur zortzi, maiatzaren 12an, Euskal Herriko Unibertsitateko (EHU) 30 ikasle epaituko dituzte Negurin, iazko abenduaren 2an errektoretza okupatzeagatik. Ikasle Abertzaleak erakundeak adierazi duenez, epaiketa hori ez da " ikasleon aurkako epaiketa bakarra izango, eta ez dira epaiketak, Bolognaren aurka eta bestelako unibertsitate eredu baten alde borrokan dihardugun ikasleon aurkako eraso bakarrak". Auziperatutako 30 ikasleei elkartasuna adieraztearekin batera, martxan jarri duen sinadura bilketaren bidez, beste bi helburu lortu nahi ditu IAk. Alde batetik, egun indarrean dauden ikasleen aurkako auziak bertan behera uztera Iñaki Goirizelaia errektore berria eta bere taldea bultzatzea, etorkizunean gatazka akademikoak unibertsitatean bertan konpon daitezen. Beste aldetik, unibertsitarioek segurtasun indar eta bideozaintza kamerak campusetatik desagertzeko eskaerarekin bat egitean, "campus polizialak" eragiten duen arbuioa publiko egitea. Sinadura datorren astelehenera arte eman ahal izango da unibertsitate eskola eta fakultateetan. Argazkian, 2008ko abenduaren 2an, 100 bat ikasle EHUko errektoregotik kaleratzeko Ertzaintzak erabilitako "bortizkeria" salatu zuten hainbat taldek, tartean iaksle bati "besoa apurtu" egin ziotela salatuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun