Arkaitz Goikoetxea, Aitor Cotano eta Iñigo Gutierrez Getxo eta Algortako preso politikoak Madrilera eraman dituzte egunotan, maiatzaren 8an egin behar dituzten diligentzia judizialak direla eta, Uribe Kostako Amnistiaren Aldeko Mugimenduak Etengabe bitakoraren bitartez zabaldu duenez. Lehenengoak Alacant (Herrialde Katalanak) aldeko Villenako espetxean dauka destinoa eta beste bi gazteak Cadizen (Espainia), Puerto III eta Puerto Iean, hurrenez hurren. Aipatu hiru lagunak, Mikel Saratxo algortarra eta beste 5 lagun ere 2008ko uztailaren 22an atxilotu zituen Guardia Zibilak; Bilbon, Algortan, Elorrion, Galizian eta Malagan egindako operazioan, Bizkaia komandoko kide edo laguntzaile izatea leporatuta. Bi egun geroago Inge Urrutia algortarra harrapatu zuten eta handik hiru egunera aske utzi, Adur Aristegi eta Libe Agirre elorrioarrekin batera, 12.000 euroko fidantza ordaintzeko baldintzapean. Saratxo urriaren 31n libre geratu zen. Guztiek torturak salatu zituzten. Argazkian, atxiloketak salatzeko Algortan egindako mobilizazioetako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun