Eneko Arruebarrenaren esanetan (mp3), “hamargarren edizio honek kaleko artistei euren egunerokotasunean laguntzea du xede, proposamen artistikoen kontratazioa eragiten duen erakusleiho bilakatuz eta kaleko arteen garapen industriala bultzatuz, aretoetatik kanpo erakusten diren arte eszenikoen egoeraren isla bihurtuz, baina baita ere, eta publikoari dagokionez, sorpresa eta dibertsioa eskaintzeko asmoz”. Jaialdia sustatu eta erreferente bihurtu duten elementuak bi direla azpimarratu du Leioako alkateak: “konpainiak, mugarik gabeko hizkuntza lantzen duten artistek eta ikuslegoa, pasa den urtean 40.000 kopurua gaindituz", aipatu duenez. Amaitzeko, eskerrak eman die Eusko Jaurlaritzako Kultura Saila, Bizkaiko Foru Aldundia, INAEM, Euskalteli eta BBKri eskainitako laguntzagatik, eta Euskal Herriko Unibertsitateak emandako laguntza ere azpimarratu nahi izan du.
Beste hainbat ekitaldi
Leioako Udaleko Kultur Saileko zuzendari Ana Lopezek, zehaztasun teknikoak eta berritasunak aipatu ditu, hauen artean, Kultur Leioak aurkezten duen espazio berria, erakusketa gela, "non maiatzaren 20tik ekainaren 28ra ikusgai egongo diren Fura dels Baus konpainiaren sortzailea den Marcel-lí Antunezen hiru instalazio”. Aurten ere “Umore Azoka” sariak banatuko direla gogoratu du Lopezek eta, horretaz gain, ohikoak diren beste ekintzak, hauen artean Artekale jardunaldien hamargarren edizioa, Euskadiko Antzerki Sarearen batzarra eta hirugarren argazki maratoia.
Eneko Arruabarrena Leioako alkateak eta Ana Lopez tokiko Kultur Saileko zuzendariak aurkeztu dute Leioako Umorearen Kale Artisten Azokaren hamargarren edizioa, gaur goizean, Bilboko Ertzilla hotelean egindako prentsaurrekoan. Aurtengo Umore Azoka maiatzaren 21etik eta 24ra bitartean ospatuko da. Hamargarren edizio honetan, Leioako Umore Azokak Euskal Herriko 17 konpainia -Araba, Bizkaia eta Gipuzkoakoak guztiak-, Estatu espainoleko 20 (Gaztela eta Leon, Madril...) eta nazioarteko beste 12 talde (Frantzia, Belgika, Kanada...) bilduko ditu. Lau egun hauetan, 55 antzezlan ikusteko aukera izango da. Horien artean 18 estreinaldiak izango dira, profesional zein ikuslego orokorrari aparteko jaialdi batekin gozatzeko aukera eskainiz. Aipatutako estreinaldiei dagokienez, 13 Euskal Herriko taldeenak izango dira, 3 Estatu espainolekoak eta 2 nazioartetik heldutakoak. Ikuskizun baten aurre-estreinaldia ere izango da Umore Azokan. Horretaz gain, Leioako Umore Azokak zazpi lanen ekoizpenean lagundu du. Argazkian, Arruebarrena eta Lopez gaur emandako prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun