Bihar, osteguna, maiatzak 7, arratsaldeko 5etatik aurrera Zuzenbide penal eta kirolari buruzko jardunaldiak izango dira Leioa eta Erandioko campuseko arrosa-leiho aretoan, Zuzenbide Fakultatean. Bertan, Zuzenbide Penala Sailak antolatutako jardunaldian, dopinaren eta kirol-ikuskizunetako bortizkeriaren ondorio juridikoak aztertuko dituzte. Zuzenbide Penaleko katedradun Norberto de la Matak zuzendutako jardunaldiak dopinaren, bortizkeriaren eta kirol-erasoen ondorio juridikoak aztertuko ditu, Zuzenbide Fakultateko Bizkaiko Atalaren eta Kriminologiaren Euskal Institutuaren laguntzarekin. Lehen hitzaldian, Miguel Angel Boldova Zaragozako Unibertsitateko irakasleak Zuzenbide Penalak kirolaren arloko dopinari nola heltzen dion aztertuko du. Ordu erdi beranduago, Eduardo Ruiz de Erentxun, Nafarroako Unibertsitateko irakaslea, kirol-ikuskizunetako bortizkeriaz mintzatuko da. Argazkian, Puerto Operaziotik aurrera txirrindularitza osoa susmopean bizi da, nahiz eta dopinarekin harremanik ez izan, Adrian Legasa bezala / Carlos Biur - ciclismobizkaia.tk
Jardunaldia "Kirol-erasoak, erantzukizun penala?" gaiari buruzko mahai-inguru batekin bukatuko da. Partaideak izango dira: Carmen Adan EAEko Auzitegi Nagusiko fiskala, Urko Jimenez Auzitegi bereko magistratu-epailea, Javier Iruretagoyena futbol-entrenatzailea, eta Rafael Alkorta futbolari ohia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun