Umeentzako tailerrak, berbenak, karaokea, fanfarreak, arkume erreak eta partidaren emanaldirako pantaila erraldoiak dira Getxo udalerrian, datorren asteazkenean, hilaren 13an, Athletic eta Bartzelonak jokatuko duten Kopako finalaren harira Udalak antolatu dituen ekitaldi nagusiak. Imanol Landa alkateak gaur goizean eman du egitarau horren azken ukituen berri. Adierazi duenez (mp3), “bat ez etortzeko aitzakia gehiegi dituen gizarte honetan, ekimen honen bitartez, herritarren elkarbizitzarako, bat egiteko eta gozamenerako aukerak bilatu eta babestu nahi ditugula. Eta Athletic da aukera hori”. Ekimenok, gainera, "Getxo biziago eta dinamikoago bat egiteaz gain, udalerriko ostalaritza eta merkataritza sektorearen aldeko mezua zabaltzeko balioko du".
Egitaraua
“Getxo Athleticegaz” izena daraman ekitaldi programa 18:00etan abiatuko dute, Itzubaltzeta / Romoko Santa Eugenia eta Algortako Telletxe plazetan, Athletici eta Kopako finalari lotutako umeentzako hiru tailerrekin (makillajea, txapak eta marrazkiak). Tailerrok Getxoko bi fanfarrek girotuko dituzte: Areatxu eta Txopolis. 19:00etatik aurrera karaokea izango da, 20:00ak arte. Ordu horretan hasiko dira Hakker eta Lotxo taldeek eskainiko dituzten dantzaldiak, Romon eta Algortan, hurrenez hurren, 21:30ak bitartean.
Ordubete lehenago, 20:30ak aldera, arkume errazioen banatzea egingo da (800 bat herri bakoitzeko), errazioko euro bateko prezioan. Elorrioko Carlos Ibarrondo burruntzi maisuak prestatuko ditu 17:00etatik aurrera. Guztira, Bizkaiko Artzain Elkarteak emandako 48 arkume erreko dira. Aipatzekoa da arratsalde osoan zehar kolore zurigorriak eta Getxoren armarria duten hitzordu historikoari lotutako lepo-zapi eta baloiak banatuko dituztela herritarren artean. Azkenik, 22:00etatik aurrera, finala ikusi ahal izango da Udalak Santa Eugenian eta Telletxen ipiniko dituen 6x4 metroko neurria duten bi telebista pantaila erraldoietan.
Bartzelona talde handia den arren, "zalantza izpirik ez" daukate Imanol Landa Getxoko alkateak eta Josu Loroño Komunikazio zinegotziak, Athleticek datorren asteazkeneko (maiatzak 13) Espainiako Errege Kopako finala irabaziko duela. Gauzak horrela, "jai giroa ziurtatuta" dago, arratsalde horretarako, Algortako Telletxe eta Itzubaltzeta / Romoko Santa Eugenia plazetan antolatu dituzten ekitaldietan. "Jakin badakigu ekitaldiok dirua kostatzen dutela", aitortu du tokiko agintariak. Hori dela eta, hori guzti hori ordaintzeko babesleak lotu ditu Getxoko Udalak, Cespa garbiketa enpresa tartean. "Garai txarrak bizitzen ari gara. Hain zuzen ere, horregatik, gozatzeko aukerak zabaldu behar ditugu", Landak aipatu duenez. Arratsaldeko 6etatik aurrera, fanfarreak, umeentzako tailerrak, karaokea, berbena eta partida ikusteko 6x4 metroko pantaila izango dira, lehen aipatu bi guneetatik bakoitzean. Horretaz gain, 24na arkume (800 errazio inguru) erreko dituzte. Euro baten truke egongo da jakia dastatzeko aukera, "batetik, horrek daukan lanari balioa eman; eta bide batez, sor daitekeen jende pilaketa ekiditeko", Loroñok azaldutakoaren arabera. Tragoak, ordea, inguruko tabernetan erosi beharko dira. Izan ere, "udalerriko ostalaritza eta merkataritzari bultzada ematea" ere bada “Getxo Athleticegaz” izenarekin bataiatutako ekimenaren helburua. Azken hori jo du arrazoi nagusitzat, Komunikazio zinegotziak, hainbat elkartek txosna jartzeko egindako eskaera atzera botatzeko. Argazkian, Loroño eta Landa Athleticen kamiseta jantzita.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun