Ekonomia 2009-05-07 20:51

Leioako Udalak krisiari buruzko hitzaldia egiteko lekua ukatu izana salatu du LABek

Erabiltzailearen aurpegia Ukberri
Orain egun batzuk, gaur arratsaldean krisiari buruzko hitzaldia emateko baimena eskatu zuten, Leioako udal erregistroan, LAB sindikatuko ordezkariek. Hitzaldia Errekalde plazako nagusien etxean izan behar zen, "hitzaldi eta ekitaldiak antolatzeko, udalerrian dagoen doako azpiegitura publiko bakarrenetarikoa baita", gaur emandako prentsaurrekoan aipatu dutenez. Baina, "bere ohiko jarrera arbitrarioari jarraiki, hitzaldiaren antolatzaileak eta gaiak gustuko ez zituenez", udal azpiegitura erabiltzeko baimena ukatu zuen Eneko Arruebarrena alkateak, Leioako udaletxeko LABek salatu duenez. Hori dela eta, "herritarren iritzi eta parte hartzearen beldur izatea" egotzi diote udal mandatariari. Lan erakunde abertzaleko kideek Arruebarrena alkateari gogoratu diotenez, "Udalhitz hitzarmenaren 149. artikuluak ordezkari sindikaloi gure jarduerarako udal aretoak erabiltzeko eskubidea” aitortu egiten digu, eta beraz, bera alkatea dela, horrek ez dio eskubiderik ematen hitzarmenaren gainetik nahi duena arbitrarioki erabakitzeko". Debekua debeku 19:30ean egingo dute hitzaldia Kurkudi herriko tabernan. Argazkian, udaletxe aurrean eman dute prentsaurrekoa LABeko kideek.
LABek aipatu duenez, "hau ez da kontu berria Leioan". Euren hitzetan, "Udalak izugarrizko diru kopurua gastatu du Kultur Leioa bezalako eraikinetan eta gero herriko elkarteak arrazoi ekonomikoengatik, ez daukatelako batzar aretoak ordaintzeko beste dirurik edo politikoengatik, EAJk horrela erabakita kale gorrian daude". Ildo horretan, Eneko Arruebarrena alkateak eta bere alderdiak "krisiaren arrazoiez, ondorioez eta are gutxiago arduradunez hitz egitea" gustuko ez dutelakoan daude lan erakunde abertzalearen tokiko ordezkariak. "Eurak dira azken urteetan langileen izerdiari esker aberastu direnak eta une honetan enpresariei inolako bueltarik gabe guztion dirua oparitzen ari direnak. Bost axola zaie langabezia, lanpostuetan langileak hiltzen egotea, jendeak hipotekak ordaindu ezin dituelako etxerik gabe geratzea", salatu dutenez. Jarrera horren "adibide garbitzat" jo du Leioako udaletxeko LABek, maiatzaren 21ean, krisi egoera salatzeko Euskal Herriko sindikatuen gehiengoak greba orokorra deituta daukan egunean bertan, Umore Azokari hasiera eman nahi izatea. Hori dela eta, "geure aurpegira zuzenean barre egin nahi izatea" egotzi diote EAJk eta Ezker Batuak osatzen duten Udal Gobernuari.

Egoera iluna

LABen arabera, "Leioan, gainontzeko herrietan bezala, langabezia gero eta altuagoa da, bi langile hil dira azken hilean lan istripuz, jendea kalean geratzen ari da bankuek hipotekarik eman nahi ez dutelako eta Vicrilako langileen egoera gero eta ilunagoa da… zer esan denda txiki eta tabernena". "Egoera honek ez dauka graziarik eta alkateak gustuko izan edo ez hitzaldi, mobilizazio eta grebaren bitartez guzti hau gainditzen lagunduko duen aldaketa politiko eta sozial baten alde lanean jarraituko dugu", udal agintariari ohartarazi diotenez.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa