Sopelan izandako hainbat lapurreten ustezko egilea atxilotu dute
2009ko mai. 8a, 11:03
Apirilean hainbat lapurreta izan dira Sopelan. Alde batetik, adineko jendeari indarrez tira eginda lapurtu diote kalean eta, bestetik, lapurretak izan dira ibilgailuetan, udal iturriek aipatu dutenez. Zehazki, apirilaren 23tik 25ra bitartean, 13 salaketa hartu zituen Sopelako Udaltzaingoak, ibilgailuetan egindako lapurretak direla-eta. Horiek burutzeko erabilitako sistema beira apurtu eta barrualdeko zenbait objektu ostea izan zen, hala nola, GPSa edo eguzkitako betaurrekoak, besteak beste, azaldu dutenez. Beharrezkoak ziren ikerketak egin ostean, ostutako hainbat objektu aurkitu zituzten txalet bateko lorategian. Ustezko gaizkilearen objektu pertsonalak ere aurkitu zituzten bertan, lapurtutakoekin batera, tokiko polizia arduradunek diotenez. Aurkikuntza egindako unean, apirilaren 25ean, ustezko delitu egileak, O.M.O. izeneko 21 urteko gazteak, epaiketa eskakizunak zituela baieztatu zuten. Ondorioz, epaitegira eraman zuten. Halaber, pertsona horrek aurrekari penal ugari zituela eta, Ertzaintzak eta zonaldeko udaltzaingoek sarri atxilotu izan dutela baieztatu zuen. Besteak beste, apirilaren 27an, Leioako taberna batean lapurreta egitea egotzita atxilotu zuten.Apirilaren 26an, emakumezko bati indarrez tira eginda lapurtu zioten Sopelako erdiguneko kale batean. Lekuko batzuek gaizkilea identifikatu zuten eta pertsona bera zen egilea, tokiko iturrien arabera. Astelehenean, apirilaren 27an, Leioako Udaltzaingoak ustezko lapurra atxilotu eta epailearen aurrera eraman zuen, bertoko taberna batean ustez indarrez lapurtzeagatik. Hurrengo egunean, asteartean, adineko pertsona batek beste “tirakada” bat jaso zuen Sopela erdigunean. Biktimak zenbait kalte izan zituen, lapurretaren ondorioz erori ostean. Kasu horretan, zerbitzuz kanpo zegoen udaltzain batek identifikatu zuen gaizkilea. Hilaren 25ean ere antzeko lapurreta gertatu zen Enrique Urrutikoetxea kalean eta bi egun geroago atxilotu zuen ustezko egilea, Getxon, Ertzaintzak. 21 urteko gaztea zela zabaldu zuen Eusko Jaurlaritzaren Herrizaingo Sailak, baina ez zuen haren izenik eman. Ertzaintza eta Udaltzaingoa gisa horretako kasuak berriz ez errepikatzeko lanean ari dira eta segurtasun neurriak hartzea gomendatzen dute, hala nola, ibilgailuaren barruan objektuak bistara ez uztea, diru osoa batera ez eramatea eta era horretako delituak beti ere salatzea, Sopelako Udalak adierazi duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun