Leioako Udalbatzak aho batez onartu du, azken osoko bilkuran, Vidriería y Cristalería de Lamiako S.A. (Vicrila) enpresako langileei "elkartasunik zintzoena" helaraztea. Halaber, "egoera ahalik eta lasterren arrakastaz gainditzea" opa diete tokiko erakundeak ordezkaritza daukaten alderdi politiko guztiek. "Salmentak %35 jaitsi" direla argudiatuta, hasieran sei hilabetean, maiatzetik azarora, ixtea pentsatu zuen Lamiakoko Vicrila enpresak. Azkenean, ordea, zortzi hilabeteko enplegua erregulatzeko dosierra aurkeztu du. Berezko lanaldiaren %40ri eragingo dio dosierrak, hau da, orotara 96 lanegun egingo dituzte langileek langabezian. 372 laguni eragiten die neurriak. Ildo berean, ez dute alde baterako beharginik kontratatuko. Orain astebete enpresak berak zabaldutako prentsa oharraren arabera, enpresa batzordeak eta langileen %87k onartu dute enplegua erregulatzeko dosierra. Argazkian, Vicrila barrutik / © Mi historia en Bilbo.
"Leioako udalbatzek beti sustatu dute industria aktibitatea gure udalerrian, eta hori izan du ezaugarri. Horregatik, enpresa eta horri lotuta dauden pertsona guztiak gure komunitate eta bizilagunen hazkundean eta oparotasunean denbora luzez laguntzen jarrai dezatela espero dugu. Horrela egin dutelako Leioan lanean hasi zirenetik, duela mende bat baino gehiago", adierazi dute udal iturri leioaztarrek. .Azkenik, "gaurko egoera gainditzeko eta enpresaren industria-etorkizunari baldintza hobeetan begiratzeko borondatea eta laguntzeko jarrera" helarazi diete langileei, "ahal dugun heinean bederen".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun