EHUko langileen prestakuntzari buruz ariko dira bihar Leioako campusean
2009ko mai. 14a, 20:34
Administrazio eta Zerbitzuetako Langileen Prestakuntza Plan Nagusia osatzen ari da Euskal Herriko Unibertsitatea. "Planean unibertsitatearen erronka berriei egokitzeko zer prestakuntza mota behar izango duten langileek zehaztuko da", EHUko iturriek adierazi dutenez. Horregatik, ostiral honetan, maiatzak 15, topaketa bat antolatu dute administrazio eta zerbitzuetako langileen prestakuntza beharrez hausnartzeko eta Valentziako Unibertsitate Politekniko, Madrilgo Complutenseko, Sevillako eta Bartzelonako unibertsitateetan garatutako esperientziak ezagutzeko. Jardunaldi hori Zientzia eta Teknologia Fakultateko paraninfoan egingo da, 9:30etatik aurrera. Argazkian, Iñaki Goirizelaia errektoreak zabalduko du batzarra.Batzarrean, administrazio eta zerbitzuetako langile guztiei egindako inkestaren emaitzak aurkeztuko dira, baita unibertsitateetako prestakuntzaren arloko arduradunek egindako erkaketarenak ere. Arduradun horiek esperientziak trukatuko dituzte eta beraien prestakuntza planen ildo estrategikoak azalduko dituzte. Gonbidatuen mintzaldien ondoren irekiko den "world cafe" delakoan eta eztabaidan ehun bat pertsonak aztertuko dituzte prestakuntza plan batek izan behar dituen helburu nagusiak, etengabeko prestakuntza eta lan-promozioa edo karrera profesionala eta prestakuntza unibertsitatearen erronka berriei aurre egiteko tresna bezala. Unibertsitateko arduradunek aipatu dutenez, EHUren 2007-2011ko Plan Estrategikoak jarri zuen konpromisoarekin bat dator hitzaldia, zdministrazio eta zerbitzuetako langileen gaikuntza eta prestakuntza hobetzea baita planaren helburuetako bat. Ekainean Prestakuntza Plan Nagusia Gobernu Kontseiluan aurkeztea eta 2009-2010ean ezartzen hastea aurreikusita dago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun