Getxoko Udalak amaituak ditu jada Maidagan parkea eta inguruak berriztatzeko lanak. Besteak beste, umeentzako eta nagusientzako jolas-guneak ipini dituzte. Parkeko zorua ere berriz lauzatu dute. Horrekin batera, hiri apaingarri berriak ipini dira (bankuak, paperontziak eta iturria) eta argiteria publikoa handitu egin dute. Maidagan, Iturribide eta Unbe kaleetan, berriz, parkearen parean dauden espaloiak zabaldu dituzte. Bitartean, oinezkoen pasabideak espaloien garaierarekin parekatu eta lerroko aparkaleku gune berriak sortu dituzte, oinezkoen joan-etorrietarako esparrua hobetu eta irisgarriago egiteko asmoz, plataforma bakarrak egokituz. Azkenik, zuhaitz gunea eta jaiak ospatzeko eremua ere zabaldu egin dituzte. Ekintza horietariko batzuk auzokideen iritziak kontuan harturik eraman dira aurrera, Joseba Arregi Hirigintza zinegotziak aipatu duenez. Lanak 821.325 euroko aurrekontua izan dute. Argazkian, Maidagan parkean bertan egin dituzte adierazpenak Arregik eta Landa alkateak.
Imanol Landa alkateak (mp3) ere auzotarren parte hartzea izan du hizpide. Gaur goizean, hedabideen aurrean, "oso positibotzat" jo du udal agintariak, “prozesuan herritarrek eduki duten partaidetza, horri esker udalak auzokideen proposamen batzuk kontuan hartu dituelako proiekturako”. Hartara, "parkeak eta bere inguruak, oinezkoentzako bide hobeagoak dituzte, azken hilabeteotan Udalak alde horretan egindako urbanizatze lanak amaitu eta gero", gaineratu duenez. Era berean, Maidagan parkeko inguruetan laster garatuko diren proiektuetarako ere auzotarren beste proposamen batzuk jasoko dituzte, Landaren arabera. Horien artean, besteak beste, espaloi gehiago zabaldu eta hobetu; Maidagan kalea eta parkea bereizi, azken hori babestuz; eta Unbe parkea egokitu nahi dute. Beraz, “lan hauen bitartez auzo bakoitzean eremu atseginak eta kalitatezkoak egokitu nahi ditugu, auzotarren arteko harremanak eta bizikidetza sustatu aldera”, alkateak (mp3) nabarmendu duenez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.