Getxoko Udalak 20.480 euro zuzenduko ditu aurten emakume elkarteentzako diru-laguntzen deialdirako. Eskaerak aurkezteko epea datorren ekainaren 16an amaituko da. Deialdiaren helburua "emakumeen parte hartze politiko eta soziala errazten duten programak eta proiektuak garatzea da, baita udalerrian gizonen eta emakumeen berdintasuna bultzatzen dutenak ere", udal iturriek zehaztu dutenez. Diru-laguntzak eskatzeko honako baldintza hauek bete beharko dituzte elkarteek: dirua irabazteko asmorik gabeko erakundea izatea, nortasun juridikoarekin, egoitza soziala Getxo udalerrian izatea, emakumeek osatuak izatea eta Eusko Jaurlaritzaren Elkarteen erregistroan eta Getxoko Erakundeen Udal Erregistroan izena emanda egotea. Era berean, nortasun juridikorik izan ez arren egoitza soziala Getxon duten pertsona fisiko edo juridikoen elkarteek ere eskatu ahal izango dute. Eskaerak udaletxean edo herritarrei arreta egiteko Getxo, Itzubaltzeta / Romo eta Algortako bulegoetan aurkez daitezke, Legeak aurreikusten dituen tokiez gain. Argazkian, Getxoko emakumeen elkarteak horma-irudia egiten Emakumeen Nazioarteko Egunean / Urtzi Altube - Ilanda.eu.
Honelako jarduerek jaso ahal izango dute diru-laguntza: emakumeen parte hartze politikoa eta soziala sustatzekoak; emakume gazteek elkarteetan parte hartzekoak; emakumeei aholkua eta informazioa ematekoak; emakumeek edota gizonek aukera berdintasunak kontzientzia hartzekoak; estereotipoak eta genero rolak gainditzekoak; emakumeen egoera eta lekua eremu guztietan hobetzekoak; eta animazio soziokulturaleko programak emakumeentzat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun