"EAJk eta PSE-EEk darabilten joko bikoitza" kritikatu du Arruek: "alde batetik, ETA erakunde terroristaren alde publikoki agertu diren ustezko pailazo batzuk Getxoko Udaletik kontratatzen ditu EAJk. Beste aldetik, orain dela hilabete eskas batzuk aurrekontuetan irudikatu duten beren babesari esker alkatetzan mantentzen den Udal Gobernuaren ekimenak kritikatzen dituzte sozialistek".
"Sozialistek Getxon sasi-pailazo horiek ez aritzea benetan nahi badute, alkatetzatik nazionalistak baztertzea ahalbidetuko duen zentsura-mozioa babestea baino ez dutela egin behar gogoratu behar diegu beste behin ere", jarraitu du popularrak. Azkenik, gertatutakoa "erabat lotsagarritzat eta penagarritzat" jo du Arruek: "emanaldia hastiko den ekainaren 15erako EAJri zentzutasuna etortzeko eta kontratu lotsagarri hau bertan behera uzteko zain gaude".
Pirritx eta Porrotx pailazo euskaldun ezagunak ikusteko parada izango dute datorren hilabetean Getxo udalerriko neska-mutilek. Izan ere, Getxoko Kultur Etxeko Kontseilu Nagusiak gaur arratsaldean burututako batzarrean baztertu egin ditu pailazoekiko kontratua apurtzeko PPk eta PSE-EEk egindako eskaerak, aurretik filtrazioek adierazitakoaren aurka. Tokiko popularrek salatu dutenez, "ezinezkoa izan da gure proposamena bozkatzea, kontratua apurtzeko eskuduntza Kultur Etxeko presidenteak baino ez duela diotelako". Aurretik ere, ezohiko bilkura egiteari jelkideek emandako ezetza gaitzetsi dute. Hori dela eta, "jarrera oztopatzailea" izatea leporatu diete EAJri eta Kultur Etxeko presidentea den Koldo Iturbe kultur zinegotziari. Baina horiek ez ezik, Getxoko PSE-EE eta Luis Almansa bozeramaile sozialista izan ditu jomugatzat Marisa Arrue PPren zinegotziak. Argazkian, Porrotx hainbat ume handirekin erretratua ateratzen, pasa den apirilaren 12an Hendaiako Aberri Egunean emandako ikuskizunaren ostean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun