Ana Lopezek konpainiak Umore Azokako benetako protagonistak direla adierazi du, haiek hautatzen baitute Leioako Umore Azoka euren proposamenak aurkezteko. “Guretzat ohore bat da, eta Leioa ikuskizunak aurkezteko erakustoki aproposa bilakatu dela adierazten du”, aipatu duenez.
Gaur goizean, SGAEk Bilbon duen egoitzan burututako prentsaurrekoan aurkeztu dute berriro, hilaren 21etik 24ra ospatuko den Leioako Umore Azoka. Parte hartuko duten Euskal Herriko -Araba, Bizkaia eta Gipuzkoakoak guztiak-hainbat taldek euren ikuskizunen berri eman dute bertan. Hartara, Alberto Garcia Umore Azokako koordinatzailea eta Ana Lopez Leioako Udalaren Kultur Saileko zuzendariarekin batera, Ados Teatroa, Debote Enbote, Jon Zabal, Ganso Clown & Cia, Kukubiltxo Antzerki Taldea, La Pez eta Teatro Salitre taldeetako kideak izan dira prentsaurrekoan. Lau egun horietan 53 antzezlan ikusteko aukera egongo da Leioan, horietatik 18 euskal sortzaileenak, eta horien artean hamahiru estreinaldiak izango dira. Aurkezpenean izandako konpainien ikuskizunez gain, Kukai Dantza Konpainiaren "Soka", Pikor Teatroren "Ellas bailan solas", Atropecias taldearen "Echadas a la mar", Los del tercero taldearen "Voces en el parque" eta Trapu Zaharraren "¡Vaya ganga!" ere izango dira Umore Azokan. Argazkian, parte hartuko duten Euskal Herriko taldeetako kide bat gaur Bilbon.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun