Historia sukaldaritza eskola batean gertatzen da. Bertan, kipulak txikitzen duten bitartean, sei protagonistak negarretan ikusi ahal izango ditugu, sukaldaritzako azken kurtsoa amaitzear daudela. Alberto Boliviako etorkina, "Piras" gazte mugitua, Ikerne neska moderno baina osasuntsua, Galder gainerakoak baino helduagoa ei dena, Xalba surflaria, Estefania jatetxe txiki baten jabe den bikotearen alaba dena eta Juantxo maisua izango dira arazo batetik bestera murgilduko gaituen ero koadrila.
Goenagak urte asko daramatza gidoilari, zuzendari eta aktore lanetan. Bai telebistan eta baita antzerkian ere, eskarmentu handiko emakumea da. Zuzendu dituen lanen artean aipagarriena “Zeru horiek” telebistarako filma izan da. Bernardo Atxagaren izen bereko nobela egokitu eta zuzendu zuen, baina kasu hartan, telebistarako. Telefilme honek, aurreneko aldiz kameraren atzean jartzeko aukera eman zion Goenagari, 2005ean. Oraingoan, berriz, zineman bere lehenengo lan luzeari ekin dio.
Filmaren aurrerakinak:
Gaur, ostiralarekin, Aizpea Goenagak zuzendutako lehen zinema film luzea, "Sukalde kontuak", estreinatu da Lauren Getxo zinemetan. Algortako kirol portuko aretoek bost sesio programatu dituzte gaurko, euskaraz baina espainolezko azpitituluekin, honako ordutegietan: 16:15, 18:10, 20:10, 22:10 eta 0:50ean. Hurrengo egunotan ere ikusgai izango da 95 minutuko filma. “Sukalde kontuak” sukalde eskola batean girotutako komedia da, non antzerki, telebista eta zinema euskaldunaren aktore ezagunek parte hartzen duten. Besteak beste, Asier Hormaza algortarra, Aitziber Garmendia, Isidoro Fernandez, Loli Astoreka, Mikel Losada, Galder Perez, Ramon Agirre, Ane Gabarain eta Barbara Goenagak osatzen dute lan taldea. Horietaz gain, Juan Mari Arza, Martin Berasategi eta Eva Argiñano sukaldariek kolaboratu dute filmean. Argazkian, Aitziber Garmendia aktore gaztea / © Cecilia Posada.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun