Gaur egin diete harrera ekitaldia, Leioako Mendibile Jauregian, aurtengo Umore Azokan izango diren antzerki talde, profesional, babesle, laguntzaile eta komunikabideei. Horrez gain, Umore Azoka 2008 eta aurreko edizioko gainontzeko sariak banatu dituzte, Eneko Arruabarrena alkatea eta Iñaki Gomez Eusko Jaurlaritzako Kultura Sustatzeko zuzendariak gidatutako ekitaldian. Hain zuzen ere, zirku munduan ibili den Ane Miren artistak jaso du Umore Azoka saria. "Bere mugimenduekin musika egitea lortu du, 20 urtetan zehar. Bere lanak Kataluniako Antzoki Nazionalean estreinatu dituen artista da. Eta, nahiz eta erretiratuta dagoen, berak ikasitakoak besteekin konpartitzen dabil orain", kultur iturri leioaztarrek aipatu dutenez. Bitartean, aurrera doa aurtengo Umore Azoka: larunbat honetan, maiatzak 23, 12:30ean abiatuko da hirugarren jardunaldia. Besteak beste, bi ikuskizun estreinatuko ditu Kukubiltxok: "Parrastatze" eta "Morttimer". Bestalde, Ganso Clown & Ciak "Caidos del cielo" lana taularatuko du lehendabiziko aldiz. Azkenik, ikusgai izango dira Teatro Meridional taldearen "Camping", Nacho Vilar Produccionesen "Business Class" edota La Industrial Teatroaren "Rojo". Gainera, lau egun hauetan eta, ekainaren 28ra arte, Marcel-li Antunezen 9 lanez osatutako erakusketa egongo da ikusgai Kultur Leioan. Argazkian, saritutako guztiak, Arruebarrena alkatearekin.
Pasa den urteko irabazleek ere gaur jaso dituzte euren sariak: Kaleko Ikuskizun Onenari Saria Citaron & Tincan konpainiari eman diote, “Freaks” lanarengatik. Zirku garaikide ikuskizuna da hori, "non teknika eta dramaturgiaren egitura dibertigarria den eszenaratzearen alde egiten duen, artista bakoitzak bere gaitasun zein kalitatea erakusten duen", azaldu dutenez. Euskadiko Kaleko Ikuskizun Onenari Saria, berriz, Gaitzerdik jaso du, "Otsoko" obrarengatik, "bere alde estetiko eta interpretatiboa orekatuz proposamen integrala delako eta eraldagarriak diren elementu eszenikoak ezin hobe erabiltzen dituelako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun