Altzaga zein Astrabuduara gerturatzeko autobusa badaukate Erandioko auzo bazterretako lagunek
Ibili badabiltza Erandioko auzo bazterrak Altzaga eta Astrabuduako herriguneekin lotuko dituzten bi autobus linea berriak. Gaur abian jarritako ibilgailuetan 30na lagun bidaiatu ahal izango dira, horietatik 21 eserita. Horretaz gain, arrapalak dauzkate autobusek ezinduek eta haur-kotxeek bertara igo ahal izateko. Ordutegiari dagokionez, ordu beteko maiztasunez ibiliko dira eta, joan-etorria, 20 eta 25 minutu artekoa izango da. Ibilbide osoak 1,10 euroko salneurria izango du, Creditrans txartelarekin ordainduta 90 zentimo. Eta bidai erdiagatik, hau da, gutxi gora behera Erandio Landatik irtenda, 45 zentimo ordaindu beharko dira. Bien bitartean, Gizatrans txartela daukaten erretiratuek 30 zentimorengatik egin ahal izango dute bidaia. Hala ere, larunbatera bitartean doakoa izango da bidaiari guztientzat. Autobus berriek 7:00etatik 23:00etara bitarteko ordutegia izango dute, astelehenetik ostiralera. Larunbatean, goizez baino ez dira ibiliko: 15:00ak arte. Eta igande eta jai egunetan ez da zerbitzurik egongo. Argazkian, hasi dira metro geltoki ingurua atontzen Altzagan.
Altzaga eta Astrabuduako herriguneetatik urrunen bizi diren auzotarrek aspaldi eskatutakoari erantzun eman nahi dio, zerbitzu berri honen bitartez, Erandioko Udalak. "Edozein izapide zein erosketak egin eta osasun etxera joateko kotxea erabili behar izaten dute aipatu bizilagunek", tokiko iturriek zehaztu duenez. Hori dela eta, autobus berrien geralekuak osasun etxe, merkataritza gune eta udal bulegoetatik gertu egongo dira. Ordutegiari dagokionez, erabiltzaile kopuruaren arabera aztertuko dute larunbat arratsalde, igande eta jai egunetara zabaldu ala ez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun