Euskal Herriko Bilgune Feministaren oharra:
Geure gorputza, geure erabakia
* Aske eta doan abortatzeko eskubidea.
* Haurdunaldien Borondatezko Etenaldiak (HBE) osasun sare publikoan.
* Abortatzen duten emakumeentzat erabateko bermeak osasunari eta arlo juridikoari dagokionez. Baita interbentzioa egiten duten osasun langileentzat ere.
* Abortua eskubide gisa finkatzea.
* Antisorgailuen doako eskuragarritasun unibertsala emakume ororentzat, osasun baldintza egokietan.
* Hezkuntza sexuala eremu guztietan. Emakumeek beren amatasuna libreki eta borondatez erabaki dezaten, baita sexualitatea bizitzeko beren modua ere, gozagarria izan dadin eta ez inposaketen bidez ezarria.
Hauek dira eta izan dira, urte askoan, emakumeen sexu- eta ugalketa-eskubideen inguruan mugimendu feministak egindako aldarrikapenak.
Baina aldi berean, erreakzio kontserbadoreek -Eliza katolikoaren eta eskubiko indar politikoen eskutik- gure eremuaren jabe egin nahi duten garaiotan, beren eskubideak gauzatu nahi dituzten emakumeei amaigabeko oztopoak jartzen zaizkie, eta bereziki abortu eskubidea oztopatu eta zigortzen da.
Izan ere, abortatu ahal izateko balizko egoerek Kode Penalaren barnean jarraitzen dute. Hainbat oztopo eta mugen bidez, emakumeok epaileen, tribunalen edota medikuen aurrera eramaten gaituzte; azkenean, beraiek dira emakumeen gorputzari buruzko erabakia hartzen dutenak. Ez da bermatzen abortua doan eta osasun sare publikoan gauzatzeko aukera. Arautu gabeko kontzientzia eragozpena dela eta, medikurik atzerakoienek, ospitaleak beren intolerantziaren erlijio-kapera bihurtu nahi dituzte, eta hauetan emakumeen erabakitzeko eskubidearen aurka, moral faltsua inposatzen dute. Eskubide hau gauzatzearen alde dauden osasun langileak etengabe jazartzen dituzte. Ikastetxe erlijiosoetan, zentzugabeko superstizioak eta zientziaz kanpokoak diren hainbat sinesmen irakasten zaizkie gazteei, honela beren gorputzaz eta sexualitateaz libreki eta askatasunez erabakiak hartzen dituzten emakumeak errudun sentiaraziz eta epaituz.
Beste behin, orain eta betiko: geu erditzen gara, geuk erabakiko dugu. Abortua Kode Penaletik kanpo nahi dugu. Ez dadila sar Eliza gure bizitzetan.
Euskal Herriko mugimendu feminista:
7MENOS20, ABORTOAREN ALDEKO NAFARROAKO ASANBLADA, ALTSASUKO FEMINISTAK, AMALATZ TALDE FEMINISTA, ANDERE BIDATZ, ARABAKO EMAKUMEON ASANBLADA, ARGITAN, ATARRABIKO EMAKUMEEN ASANBLADA, HANGO ETA HEMENGO EMAKUMEAK, BASAURIKO EMAKUMEON TALDEA, EMAKUMEAK ANIZTASUNEAN, BIZKAIKO EMAKUMEEN ASANBLADA, EMAKUME INTERNAZIONALISTAK, ERMUKO EMAKUMEEN ASANBLADA, EUSKAL HERRIKO BILGUNE FEMINISTA, FORUM FEMINISTA MARIA DE MAEZTU, GARAIPEN, HAGIN, HANKAZ GORA, IDUNA, LANBROA, LIZARRAKO KOORDINADORA FEMINISTA, MEDEAK, PLAZANDREOK, SORGINAK, TXANTREAKO EMAKUMEEN ASANBLADA, UXU ONDARRUKO EMAKUMEEN TALDEA.
Europarako hauteskundeen bezperan abortuaren aldeko manifestazioa izango da Bilbon
Euskal Herriko mugimendu feministak deituta, datorren ekainaren 6an, larunbata eta Europako Legebiltzarrerako hauteskundeen bezpera, abortatzeko eskubidearen aldeko manifestazioa egingo da Bilbon. Gaur goizean Bilboko burtsa zaharrean emandako prentsaurrekoan, hainbat emakume talderen ordezkariek jarri dute hitzordua, horretarako makina bat arrazoi dagoelakoan. Horrela, "Gure gorputza, gure erabakia" lelopean egingo da protesta. Izan ere, gaur egun "emakumeon gorputzen inguruan erabakitzeko boterea" dutenak "azken finean" epaile eta medikuak direla salatu dute. Era berean, hezkuntza zentro erlijiosoetan oraindik orain "gure gazteria sineskeria aberrante eta sinesmen ez zientifikoen bidez doktrinatzen dute, beren gorputzez eta sexualitateaz era askean erabakitzen duten emakumeak errudun bihurtuz eta gaitzetsiz" gogoratu dute feministek. Baina, zentro erlijiosoetatik harago, "Eliza Katolikoa eta eskuineko indar politikoek" darabilten "erreakzio eta kontserbadorismoa" kritikagarritzat jo dituzte. Azkenik, laburbildu dutenez, egun emakumeen eskubideei "etengabeko oztopoak" jartzen dizkiete eta "aborturako eskubidea mugatzen eta zigortzen jarraitzen da". Argazkian, pasa den mart6xoaren 8an Algortan egindako mobilizazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun