Gaur epaiketa egin behar zieten, Madrilen, Xabier Garcia Gaztelu "Txapote" eta bere bikotekide Irantzu Gallastegi preso politiko berangoztarrari. Hala ere, data zehaztu barik, atzeratzea erabaki du Espainiako Auzitegi Nazionaleko Zigor Arloko Lehenengo Aretoak, Europa Press albiste agentziak jakinarazi duenez. 1998ko urtarrilaren 9an, bonba-autoa jarriz, Jose Ignacio Iruretagoyena Zarauzko PPko zinegotzia hiltzea leporatzen diete biei. Auzitegiko iturrien arabera, Blanca Martinez fiskalak eskatu du gaurkoz epaiketa bertan behera uztea, deklaratu behar zuen "lekuko nagusietako bat" egon ez delako. Garcia Gaztelu eta Gallastegirentzat 61na urteko espetxe zigorra eskatzen du fiskalak, "hondamendi terrorista (18 urte), erailketa terrorista (30 urte) eta zauri terrorista (13 urte)" beste hainbat delitu egotzita. Halaber, zigorra bete eta bost urteko epean, Zarauztik, kilometro erdi baino gutxiagora hurbiltzea debekatu nahi diete. Argazkian, Gallastegi eta Garcia Gaztelu 2006ko ekainean egin zieten epaiketan / Etengabe.
Bestalde, Iruretagoyenaren oinordekoei 300.000 euroko kalte ordaina ematea eskatzen diete; eta beste 1652,78 euro ibilgailuan eragindako kalteengatik. Zarauzko Udalari, berriz, 985,44 euro ematea eskatzen dute, higiezinetan eragindako kalteengatik. Irantzu Gallastegik 1994ko azaroan ihes egin zuen, ETAren Bizkaia komandoko ustezko hainbat kide atxilotu zituztenen garaian, eta 1999ko martxoaren 9an atxilotu zuen Frantziako Poliziak, Parisen, ETAko kide izatea egotzita. Geroago, aldi baterako Espainiako Justiziaren esku utzi zuen Frantziakoak berangoztarra, Espainiako Auzitegi Nazionalean epaiketa egiteko. 2003an, berriz ere Frantziara eraman zuten, gelditzen zitzaion espetxe zigorra han betetzeko. Zigor hura osorik bete ostean 2005ko ekainaren 14an estraditatu zuten. Espainiako Justiziak, besteak beste, 1993 eta 1999 bitartean, Bizkaia eta Donostia komandoetan aritu izana eta Fernando Mugica Herzog abokatua eta Miguel Angel Blanco Ermuko zinegotzi popularraren heriotzetan parte hartu izana leporatzen dizkio. Azken hori egotzita, 50 urteko espetxe zigorra jarri zioten berangoztarrari, 2006ko uztaila hasieran. Martxoaren 14an, A Coruña aldeko Curtis-Teixeiro espetxera aldatu zuten Xabier Garcia Gaztelu "Txapote", bere bikotekide Irantzu Gallastegi berangoztarra eta Arane alabarekin egon ahal izateko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun