Zerbitzua eta EuskoTrenekiko loturak ondo joan daitezen bermatzeko, "segurtasunezko neurri prebentiboak" hartuko ditu Metro Bilbaok, Boluetan jendetza handia ez pilatzeko. Horrela, langile gehiago ipiniko dira geltoki horretan, laguntzeko eta argibideak emateko, egun osoan jende asko ibiliko dela aurreikusita. Antolatzaileek 100.000 pertsona inguru joango direla kalkulatu dute.
Era berean, hainbat gomendio ezarri dira zirkulazioa ahalik eta ondoen eta azkarren joan dadin, bidaia erosoago izatea eta jendetza pilatzea saihesteko, besteak beste, Ibilaldira joateko metroa hartzea Boluetaraino eta han EuskoTren Zuhatzuraino; taldean joanez gero, metrorako eta EuskoTrenerako balio duen hamar bidaiako txartela erostea; jendetza saihesteko metroan joan-etorrikoa edo Creditrans erabiltzea; eta megafoniatik, teleadierazleetan, informazioko euskarrietan zabaltzen diren aginduak eta jarraibideak errespetatzea eta Metro Bilbaoko langileen esanei jaramon egitea.
"Gerizpetik eguzki begire" lelopean, igande honetan, maiatzak 31, ospatuko da Galdakaon Ibilaldia, Bizkaiko ikastolen aldeko jaia. Hori dela eta, dispositibo berezia jarriko du martxan Metro Bilbaok. Trenen maiztasuna bost minutukoa izango da San Inazio eta Bolueta artean, ia egun osoan, bi norabideetan, azken geltoki horretako Metro Bilbaoren eta EuskoTrenen arteko lotura errazteko. Ibilaldiaren 2009ko edizioaren antolatzaileek EuskoTrenen Zuhatzuko geltokitik gertu dagoen zirkuitua diseinatu dute; hartara, Metro Bilbaoren linea eta, zehazki, Boluetako geltoki intermodala puntu erabakigarria izango da Bilboko metropolitik Bizkaiko ikastolen jaira garraio publikoan joan nahi dutenentzat, adierazi dutenez. Argazkian, iaz Zornotzan izan zen Ibilaldia / Gauilunak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun