Arau berriak "auzotarrek aisialdirako eta atsedenerako duten eskubideak" bateratu nahi ditu "era jasangarrian". Halaber, udalerrian ostalaritzaren sektorea leheneratzea ahalbidetu nahi da.
Ordenantzak hainbat gai arautzen ditu. Jarduera espezifikoak eta kokalekuen baldintzak (ostalaritza saltokien arteko tartea arautuko du) multzotan sailkatzen ditu; ekipamendua eta higiene eta osasun baldintzak; lokaletako kutsadura akustikoa gutxitzeko neurriak; eta lizentzien emakida, iraungitzea eta luzatzea arautzen ditu ere, besteak beste.
Ostalaritza sektoreko establezimendu guztiengan izango du eragina eta janari-edarien alorreko batzurengan ere, -hala nola, izozki-denda, gozotegi, dastaleku, ogitarteko-dendak,... - bezeroei edariak edo janariak lokalean bertan zerbitzatuz gero, baita antzeko jarduera duten mintzalekuengan ere.
Orain arte indarrean zegoen arauari buruz aldatu den gairik garrantzitsuenetakoa da eragin ditzaketen arazoen arabera jarduerak taldeka sailkatzen dituela, 5 multzo sortuz. Halaber, lokalen arteko tartearen mugatzea kentzen du, mintzalekuetan, taberna berezietan, pubetan, klubetan,...eta dantzalekuetan ezik, 100, 150 eta 300 metrotan finkatzen baitu tartea, hurrenez hurren. Kanpoan barrak ipintzea ere eragozten du, izozki-denda eta antzekoen multzoan ezik eta 40 metro koadroko gutxieneko azalera erabilgarriaren baldintza ere baliogabetzen du.
Getxo udalerriko "hiri eremuan jarduera handiago baten garapena bultzatzea, Getxo biziago bat egin aldera, eta, bide batez, ekonomiaren bizitasun handiagoaren alde egitea" dira, udal iturrien arabera, pasa den ostiralean onartu zen ostalaritza udal ordenantza berriaren xedeak. Testu berriak 2007ko otsaileko arautegia ordezkatuko du eta EAJ eta PSE-EEren sostengua dauka. Alderdi horiek azken hilabeteotan ordenantza egiteko garatutako "elkarlanak" aztertu egin ditu Getxo Enpresa eta Merkataritza Elkarteak egindako iradokizunak. Ordenantza berri horren bitartez, eta beste neurri batzuen bitartez, herriko erdiguneak "biziberritu" nahi dituzte. Proposamen hori gehitzen zaie pasa den martxoan onartutakoei, hots, gune publikoetan terrazak ipintzeko eta baita lonjak etxebizitza egiteko neurriak arautzekoak. Besteak beste, ostalaritza jarduerak ere garatzen dituzten mintzalekuak ere hartuko ditu bere gain testuak. Argazkian, terraza bat Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun