Iñigo Urkullu EAJren buruzagi nagusiak, berriz, Patxi Lopezen GObermnua izan zuen jomugatzat. "Eusko Jaurlaritzak bihar ez dela Bizkaiko Ikastolen egunean egongo esan du. Ez dira Ibilaldira joango, egun berean "arrosaren jaia" ospatuko dutelako eta Zapatero bera ere egongo delako. Hezkuntza sailburuak eta gainerako sailburuak alderdi barruko ekitaldian egongo dira. Zenbatetan entzun behar izan dugu Euskadi gure batzoki bilakatu nahi genuela? Zer nolako gogortasunez esan digute Alderdiaren interesak helburu orokorren gainetik jartzen genituela? Ez Herri Urrats, ezta Ibilaldia ere. Ahaldun Nagusiak ere ez dituzte hartu. Ez euskararik, ez ikastolarik, ez instituzioekiko ardurarik. Non dute haiek herri honekiko konpromisoa? Non dago herri gisa ditugun erakunde eta ikurrekiko konpromisoa?", itaunka aritu ostean PSE-EEri deitu zion Gobernua izateko eta ez "Lakuako herriko etxea".
Azkenik, Urkulluk ezbaian jarri zuen EA eta Aralar barne biltzen dituen Independentistak eta Ezkertiarrak koalizioak Euskal Herriko interesak defendatuko duenetz, eta gogoratu zuen litekeena dela ERC-rena izatea bere ordezkari bakarra. Iniziatiba Internazionalistari buruz, ordea, susmagarri jo zuen hautagaitza azkenean legala izatea eta PSOEri zein II-HEri deitu zien horren gaineko azalpenak emateko. Ildo horretan, "inoiz baino gehiago" EAJri botoa emateko eskatu zuen.
Areetako Eskoletako plazaren itzalpean babestuta, 200 bat jeltzalek, gehiengo adinekoa, jarraitu zuten larunbatean Izaskun Bilbao Europarako Koalizioaren hautagaiak eta Iñigo Urkullu Euzkadi Buru Batzarraren presidentea. Bilbaok Ertzaintza izan zuen mintzagai nagusia. Bere ustez, EAEko Polizia autonomikoa Schengen-go akordiotik kanpo uzteak "Euskadiren eta beren hiritarren segurtasuna kaltetu du". Hainbat kasutan, "hemen, Getxon bertan, euskal Poliziak ezin izan du bestela lortuko zuen eraginkortasunez jardun, Herrizaingo Sailera heldu ez ziren beste herrietako operazioetan eskuratutako datuak ez izateagatik", ziurtatu zuen Bermeoko politikariak. Gainera, Bilbaok salatu zuen Ertzaintzak "informazio hori izan zezan oztopatzen zuten berberek" kritika lazgarriak egin zizkiotela Polizia autonomikoari. Era berean, Europan kontzertu ekonomikoa blindatzeko beharra erakutsi zuen eta kritika gogorrak bota zizkien ildo horretatik PPri zein PSOEri. Gaur, Bilbaok beste mitin bat emango du Algortako kirol portuan, 17:00etan. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun