Horrela, EAJren Gobernu Taldeak aurkeztutako aurrekontuak "udalerako ekipamendu berrietarako inbertsioa eta gastu soziala lehenetsi ditu krisi garai honetan", tokiko agintariek nabarmendu dutenez. Jelkideen hitzetan, "helburua, instituzioak ekonomiaren eragile bihurtzea da, zailtasun sasoi honetan. Hori guztia, Diruzaintzak duen soberakinari esker eraman daiteke aurrera, aurreko urteetan eramandako kudeaketari esker. Izan ere, aurreko urteetan kudeaketa lehenetsi da gastuaren ordez. Alderdi ekonomikoan oinarri sendoak izan dituen erakundeak zorretarako gaitasun handiagoa du aurrekontu hauetan".
Udaltzain gehiago
Bestalde, aurrekontuak beste bi egitasmo "garrantzitsu" aurreikusten ditu: alde batetik, herritarrentzako harrera zerbitzua hobetzea, beharrezkoak diren azpiegiturak eta instalazioak abian jarriz. "Azpiegitura eta instalazio horiek herritarrek izapideak era hurbilago eta eraginkorrago batean egitea ahalbidetuko dute", udal iturrien arabera. Bestalde, Udaltzaingoaren lantaldea zehaztu egin dute, eguneko 24 orduko lan ordutegia bete dezaten, urteko 365 egunez. Horregatik, administrazioko 5 langile eta Udaltzaingoko 13 agente berri hartuko dituzte. Gainera, egitasmo hori, EAJren Gobernu Taldeak eta gainontzeko alderdi politikoek "beharrezkotzat" jo dute, udal arduradunek zehaztu dutenez. Hori dela eta, jelkideek "esker ona" helarazi diete gainontzeko alderdiei, "egitasmoak jaso duen babesagatik".
EAJ eta PSE-EE alderdien aldeko botoekin, joan den osteguneko (maiatzak 28) osoko bilkuran onartu zuen 2009 urterako aurrekontua Sopelako Udalbatzak. Orotara, 22.072.423 eurokoa izango da. Hartara, iaztik hona %7,40 handitu da udal aurrekontua. Diru guzti horretatik %18 ordainduko dute zuzeneko zergetan sopeloztarrek, udal iturriek nabarmendu dutenez. Aurrekontu horretan barneratuta dago, inbertsio atalean, beste diru partida batzuen artean, Zalduko haur eskola abian jartzea edo Urko kiroldegiko azpiegitura berria. Espainiako Gobernuari eskatutako dirua ere erabiliko dute bi egitasmo horietan. Halaber, diru sarrera urriak dituzten pertsonentzako gizarte laguntzak onartu dira, hala nola, etxean jasotako zerbitzuaren hobekuntza, pertsona nagusientzako telealarma programa, gizarte eta haur egitasmoetarako partidak handitzea, Behargintzako enplegu eta programa sozialak garatzea, berdinketa eta herritarren segurtasunerako planetarako gastuak handitzea; eta mugikortasun jasangarria sustatzea. Argazkian, aurreko udal batzar bat Sopelan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun