Zugarramurdiko Udalak, Sorginen Museoak eta Akelarre Elkarteak antolatuta, herri nafarrak Sorginaren Egunaren bigarren edizioa biziko du ekainaren 20an. Egunean zehar jarduera ugari egingo dira herriko kaleetan, museoko auditorioan eta kobazuloetan. Besteak beste, Sorginkeria eta Erdi Aroko Feria egingo da 11:00etatik 19:30era bitartean, saltoki eta kontsulta postuekin. Eguerdian, Sylvie Imberdisek “Astrologia eta sorginkeria” hitzaldia eskainiko du, frantsesez, Sorginen Museoko auditorioan. Akrobazia eta malabarismo jolasekin amaituko da goizeko jardunaldia.
Hitzaldiak, ipuin kontaketa euskaraz, akelarrea...
Arratsaldean, berriz, "XVI-XVII mendeetako emakumea" hitzaldia eskainiko du, 16:00etan, Jose Antonio Azpiazuk. Jarraian, partaideek kobazuloetara bisita egiteko aukera edukiko dute. Bertan euskarazko ipuin kontaketa egingo da. 20:30ean akelarrearen txanda iritsiko da, herriko antzerki taldearen eskutik, eta Tusuri taldeak festari amaiera emateko ikuskizuna eskainiko du.
Ekainaren 20an, larunbatarekin, Sorginaren Eguna ospatuko da Nafarroa Garaiko Zugarramurdi herrian. Hori dela eta, goizetik gauera arte luzatuko diren ekitaldietan parte hartzeko txangoa antolatu du Uribe Kostako Mankomunitateko Euskara Zerbitzuak. Izen-ematea aipatu erakundea osatzen duten udalerrietako, hau da, Barrika, Berango, Gorliz, Lemoiz, Plentzia, Sopela edota Urdulizko kultur etxean egin beharko da, horretarako epemuga ostirala (ekainak 5) dela. Autobuserako txartela 6 eurotan egongo da. Bakoitzak bokata eta edaria eraman beharko du Mankomunitateko arduradunek zehaztu dutenez. Bestalde, 18 urtetik beherakoek gurasoekin edo tutore batekin joan beharko dute txangora. Argazkian, Leioan ere antzeztu ohi dute akelarrea San Juan gauean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun