Asteko programari dagokionez, udalerriko ikastetxetako lehen eta bigarren hezkuntzako ikasleentzat, idazlan txapelketa antolatu dute eta “Getxoko ura. Uraren garrantzia eta bere erabilera arduratsua” izango du gaia. Argazki digitaleko lehiaketa ere egingo da “Ura Getxon” gaiaren inguruan, herritar guztiei zuzenduta. Gerora, lehiakideen argazkiekin erakusketa antolatuko da. Bi lehiaketetarako lanak emateko epea ekainaren 30ra arte egongo da zabalik. Sariak izango dira bi lehiaketetako irabazleentzat (kamera digitalak, biziklelak, bertoko jatetxetan afariak...).
Bestalde, ekainaren 6an, larunbata, ibilaldi gidatua egingo dute Azkorriko hareatzatik eta, hurrengo egunean (hilak 7), txoriei eraztuna nola jartzen dieten ikusi ahal izango da Bolueko hezegunean, urari lotuta dauden bi ekosistema direla. Aste Berde osoan zehar “El sueño del agua” izenburuko dokumentala eskainiko dute, Algortako Villamonteko kultur etxean bai bigarren hezkuntzako ikasleentzat (goizeko ordutegian, 10:00-12:00), bai gainontzeko herritarrentzat (azken hauentzat ekainaren 10ean, asteazkena, 19:00etan).
Ur aurrezkailuak
Azkenik, hilaren 9 eta 10ean, 11:00tik 14:00ak arte, txorrotan jartzeko 2.000 ur aurrezkailu banatuko dituzte Algorta Telletxe eta Areetako Xake plazetan, hurrenez hurren. Ingurumen Arloko zinegotzi Keltse Eigurenek azaldu duenez, “gailu hauek, iturrietan ipinita, erabiltzen dugun uraren %50 aurreztea ahalbidetzen dute”. Horiekin batera, orri informatiboa banatuko dute ura erabiltzeko aholku errazak emanez, hala nola, bainua erabili beharrean dutxa hartzea, edo zisterna barruan bi botila beteak ipintzea hura erabiltzen dugun bakoitzean 2-4 litro aurrezteko.
“Ura ezinbesteko baliabidea. Ez alferrik erabili” lelopean egingo da Getxoko Aste Berdea, ostiral honetan (ekainak 5) izango den Ingurumenaren Nazioarteko Egunaren harira. Getxoko Udalaren Ingurumen Arloak antolatuta, egun horretatik hilaren 12ra bitartean, jarduera sorta egongo da, eskoletako ikasleei zein herritar guztiei zuzenduta. Ekimenaren helburua da, iraunkortasuna giltza dela, ur edangarria eta gainontzeko natur baliabideak ondo erabiltzearen beharraz sentsibilizatzea eta arduratzea, Imanol Landa alkateak (mp3) nabarmendu duenez, “Lurrean ondare urria delako, baita gure herrian ere, lehorte arriskutik ez baitago salbu”. Horregatik, Landak aipatu duenez, “agintarienaz gain, herritar guztion konpromisoa beharrezkoa da, natur baliabideak ondo erabiltzea bermatuko duten neurriak hartu aldera”. Aste Berdeari buruzko argibideak edo bere jardueretan parte hartzeko izena eman nahi dutenek 944 660 191 telefono zenbakira deitu edo ingurugiroa[abildua]getxo.net helbidera jo ahal dute. Argazkian, Landa alkatea eta Keltse Eiguren Ingurumen zinegotzia, gaurko prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun