Imanol Landa alkate getxoztarraren hitzetan (mp3), “hitzarmen berria sinatzea beste urrats bat ematea da; oso pozgarria eta garrantzitsua da guretzat, gure altxorra den azpieuskalkiaren ondarea sustatzeko lanak egiten segitzea ekarriko baitu”. Kalitate handia duen lan hori beharrezkotzat jo du udal agintariak, “gure euskalkia gero eta jende gutxiagok hitz egiten duenez lan egin behar baita ez galtzeko eta mantendu ahal izateko”.
Helburu didaktikoa
“Ondare etnolinguistikoa jaso eta zabaltzeko urte askotako proiektu baten pausu bat da hitzarmena, hain zuzen ere, aspalditik egiten ari den lanaren jarraipena eta baita hemendik aurrera egin beharreko lan ugariren abiapuntua ere", Landak nabarmendu duenez. Juan Olea Urdulizko alkate eta Uribe Kostako Mankomunitateko presidenteak (mp3), berriz, oso garrantzitsutzat jo du egiten ari den lana eskoletan zabaltzea. Gaineratu duenez, “bien arteko kolaborazioa luzea izatea espero dut, eginbehar hauek beharrezkoak baitira, egungo umeek euskara jakin arren gutxi erabiltzen dutelako".
Eskualdeko euskara jaso eta zabaltzeko bigarren hitzarmena sinatu dute Getxoko Udalak eta Uribe Kostako Mankomunitateak
Eskualdeko hizkuntza ondarea jaso eta zabaltzeko lankidetza hitzarmena sinatu dute gaur goizean Getxoko Udalak eta Uribe Kostako Mankomunitateak, orain urte batzuk izenpetutako akordioari jarraipena emanez. Ekimena aipatu bi erakundeen euskara sustatzeko plan estrategikoen barruan kokatzen da eta 2010eko abenduaren 31ra arte egongo da indarrean. Uribe Kostako azpieuskalkia eta horrek daukan aberastasun guztia jasotzea zen 2005etik 2007ra indarrean egon zen hitzarmenaren helburua. Horretarako, 120 euskaldun zaharrei audio eta bideo grabaketak egin zitzaizkien, ondoren materiala digitalizatu eta sailkatzeko. Egitasmo berriaren lehenengo helburua aurreko akordioaren ondorioz sortutako materialaren kopiak egin, hori banatu eta bere erabilera sustatzea da, ikastetxeetan, euskaltegietan, kultur eta kirol elkarte eta hizkuntza-transmisio helburu duten taldeen artean. Bestalde, kultura edota hizkuntza lantzen duten talde edo banakoen eskuetan ere utziko da. Jasotakoa azterlan, ikerketa, tesi, ikastaro eta abarretan erabiltzea izango da xedea. Argazkian, Imanol Landa alkateak eta Juan Olea Mankomunitateko presidenteak izenpetu dute hitzarmena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun