Diseinu lehiaketan, Bartzelonako Sozo Disseny metal-tailerrak irabazi du lehenengo saria, metalez eginiko biolinaz baliatuz. Bigarren saria Larrukin tailer getxoztarrak eskuratu du larruzko xake bati esker. Stand lehiaketari dagokionez, Culleredoko (A Coruña, Galizia) C. Canouras Encajes ehungintza tailerra atera da irabazle eta, bigarren saria, Martorelleko (Bartzelona, Herrialde Katalanak) Geppeto Lobo papera eta alanbre tailerrak eskuratu du.
Hainbat espezialitate
Aurtengo azokan hainbat espezialitate erakutsiko dira: zeramika, bitxigintza, ehuna, harriak, metala, larrukigintza eta landare-zuntzaz eginiko lanak. Halaber, ezin dira ahaztu eskulangintzan hain ohikoak ez diren beste arlo batzuk ere, azokan ikusgai egongo dira-eta. Guztira, 28 izango dira ikusi ahal izango diren eskulangintza arloak. Gainera, gastronomia-gunea ere izango da, Ibaiondo kalean, hain zuzen ere, eta bertan 14 salerosle egongo dira.
Salmenta-guneaz gain, aurten erakustaldiak egiteko gunea ere egongo da azokan. Bertan, goizez eta arratsaldez, lau eskulangile jardungo dira zuzenean, publikoak eskulanak nola egiten diren ikusteko. Aurten, Toledoko Fatima Carrasco eskulangileak eskuz eta goruz eginiko irutearen teknikak erakutsiko ditu. Bestalde, Belen Alonso eskultore asturiarrak harri-zizelkatze tekniken erakustaldia egingo du. Azenik, Jose Ramon Aguirre kandela-egile bilbotarrak argizaria nola lantzen den azaldu eta erakutsiko du. Gainera, azken eskulangile horren eskutik, gaztetxoenek kandelagintza ezagutu ahal izango dute, haurrentzako tailerra egongo da eta.
Bartzelona eta A Coruñako artisauek irabazi dituzte Getxoko Eskulangintza Azokaren diseinu eta stand lehiaketak
2009ko eka. 5a, 18:26
Getxoko Udalbatza osatzen duten zinegotzi gehienak lagun zituztela, gaur goizean inauguratu dute Eskulangintza Azokaren 26. edizioa, Imanol Landa alkateak eta Izaskun Artetxe Berrikuntza eta Ekonomia Sustatzeko foru diputatuak. Horrekin batera, diseinu eta stand lehiaketen irabazleak ezagutzera eman ditu Getxoko Kultur Etxeak: Bartzelonako eta A Coruñako artisauek eskuratu dute saria, hurrenez hurren. Azoka Areetako Xake plazan kokatuta dago eta, bertan, igandera arte, 100 bat postutan saltzen diren hainbat espezialitateetako artikuluak ikusteko edota erosteko aukera egongo da. Bestalde, Itzubaltzeta / Romoko Ibaiondo kalean, Gastronomiaren Gunea kokatu dute. Horretan 14 saltoki daude. Azokaren ordutegia honako hau da: 11:00etatik 14:30era goizez eta 17:00etatik 21:00era arratsaldez. Larunbatean, 21:30ean itxiko da arratsaldez. Iaz bezala, sarrera doakoa da. Argazkian, Artetxe eta Landa xingola mozten. Argazki gehiago ikusteko sakatu hemen.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun